金管局總裁Norman陳德霖執掌帥印後，噚日首次帶住銀行公會訪問團抵達上海，今日將轉戰北京，向一眾財金部委進行禮節性拜會。喺金管局擔任副總裁時，Norman已憑標準京腔「刨冬瓜」，喺港府高官中「響晒朵」，金融海嘯後，祖國由世界工廠變為金融大國，人仔（人民幣）走勢進一步看俏，點樣深化本港人民幣業務同試點中心地位，自然成為陳總同一眾賓架，跟內地官員討論嘅亮點。
無緣見周小川
華華聽聞，如無更改，三日兩夜嘅行程，重點會係聽日下午，拜訪國務院副總理王岐山；呢位有「京城名嘴」之稱嘅副總理，魅力非凡，專攻內地金融改革發展，對人民幣業務睇法自然極具權威。
今日訪問行程都唔弱，分別會晤人行新任副行長朱民、中銀監主席劉明康，同埋中國證監會副主席姚剛。雖然呢次見唔到人行行長周小川，但相信呢個月初Norman以金管局總裁身份，喺英國參加G20峯會時，應該已經同小川交流過。
銀公訪問團噚日會見上海市副市長屠光紹，會後陳總話，人行同銀監對開展人民幣業務反應正面，會研究點樣優化現有安排。
王冬勝：滬港應互補優勢
銀公會主席王冬勝亦補充話，上海同香港兩地，應該互補優勢，擴大我哋祖國喺世界金融舞台嘅影響力，又話會同人行屬下部門研究，點樣可以增加人民幣流通咁話。
李華華
mailto:[email protected]