上回講到比香港大嘅崇明三島，將成為上海後花園，專起豪宅畀上海有錢人住，因為當地從前係一個孤島，出入唔方便，自從接通上海嘅長江隧橋通車後，路程縮短至一小時經濟圈，頓時令呢個人口只得60幾萬嘅「小島」充滿生氣，未來幾年仲會成為上海接連江蘇嘅重要樞紐。
個島咁大，現時最值錢係仍未發展嘅東灘，同已有部份物業發展嘅陳家鎮，嗰度正正是大橋嘅落腳點。上海「本地薑」A股亞通係國資委背景，擁有2380畝農地，另有140畝住宅用地等開發。發展商話，崇明會成為「中國濟州島」，住宅及旅遊業將受嚴格控制，所以呢個「長江門戶」遲遲未能大興土木。根據上海統計局資料，崇明、長興、橫沙3島去年嘅住宅施工面積只有38萬平方米，一江之隔嘅浦東就有近2000萬平方米，所以今年頭7個月當地地產投資急增19%，係全上海最高，亦解釋咗點解下月其中一個高爾夫球別墅盤定價，可以去到每平方米4萬元人民幣（下同）咁誇。
方興係崇明島大地主
能夠喺全球知名嘅重要濕地置業，當然係身份象徵，去年1月英國首相白高敦訪滬，同中方簽咗有關開發呢度為全球有典範意義嘅可持續發展生態城市。為保持濕地原貌，上海市政府落咗Order，世博前要Keep到靚靚畀各國元首參觀。
中化集團地產旗艦，非常低調嘅方興地產（817），如果大家以為佢只得金茂嘅話，就真係「阿茂」，其實佢係崇明島陳家鎮大地主。去年11月，方興成功投到當地22萬平方米地皮，同時租埋隔籬95萬平方米地，加起嚟足足係十分一個島咁大，呢塊靚地唔使問當然又係用嚟起高球場連別墅，未來一兩年就賣得。
除咗長三角大計，方興喺雲南麗江世界遺產公園原址，亦有33萬平方米土儲準備起綜合商業項目，仲有玉龍雪山的金茂玉龍雪山度假酒店，總建築面積1.6萬平方米，集團去年毛利亦高近四成，現有資產不俗，未來發展亦Good，當金融股炒完資金轉炒內房，擺脫埋長方形走勢，呢條非池中物應唔會令中線投資者失望。
胡孟青