揸正政改大旗嘅唐唐，早喺政改諮詢文件推出前已經四出約見政黨摸底，但就幾乎獨漏曾經批評佢英文水平嘅葉劉淑儀。早前已為此呻過嘅葉太噚日喺商台節目重提舊事，話喺唐唐發出英雄帖前幾星期，林瑞麟約佢單獨食飯講政改，但局長同司長始終有別，林D9約完唔等於唔使見司長。
唐唐得悉葉劉抱怨，即刻補鑊派人約番葉太；但負責約葉太嘅人竟然同葉太話司長同局長講嘅嘢都係差唔多啫。
「越煩越要見」
既然人哋講到咁，葉太嬲嬲哋索性話唔去。葉太至今都唔明點解會得到唐唐「特別對待」，話可能人哋嫌佢「煩」都未定喎。葉太進言，話如果佢有大志，應該「越煩越要見」。
葉太講到明，唔會仿效金勞詹咁同泛民一齊總辭，佢愛將史泰祖亦唔會參加補選。至於泛民點解要派陳淑莊出戰？葉太估計因為Tanya可以着花旗袍拉票。佢咁講唔通係羨慕（或妒忌）Tanya喺曾鈺成婚宴中着旗袍搶晒鏡？