白鴿黨主席何俊仁大頭蝦人所皆知，等於太陽喺東邊升起一樣冇乜特別；佢嘅最新「傑作」係唔見手提電話。事緣日前唔少人想搵仁哥搵唔到，以為佢為避風頭，唔想喺五區總辭問題上講多錯多而唔覆機，但中委林子健幫仁哥澄清，話仁哥查實係因為唔見咗部手機，當晚仲要打電話畀佢，問佢攞番唔少黨員電話，力證仁哥無心迴避。
大佬唔易做，相信仁哥近日一定感受到。至於提出五區總辭嘅社民連大佬，壓力顯然比仁哥細，事關佢哋辦事處嘅20幾個職員都好生性，個個表明唔介意一旦總辭冇咗份工，一班大佬老懷安慰之餘，就拍心口保證一定會賠足畀職員，唔會做無良僱主。