港股上禮拜五跌穿10日線，噚日好友快手快腳推番上去，無他，呢個禮拜五期指結算，唔做番啲嘢，容乜易前功盡廢。
噚日恒指升番315點，企喺22771收市，好友仲係佔上風，如果外圍市況相就，應該可以推高幾百點結算。內銀股表現最搶鏡，建行（939）升勢有成交配合，睇嚟好快試8元。
建行C輪17919：建行昨收7.40元，升4%，如果上破8元，睇8.30元，可以諗吓隻C輪17919。
隻輪現價47.5仙，2010年3月1日到期，行使價7.70元，溢價10.4%，引伸波幅38.9%，槓桿率15.5倍（有效7.2倍），正股升上8.30元，17919升幅逾倍，就算喺8元止步，隻輪都有接近7成升幅，如果正股跌穿7.10元，就沽咗隻輪止蝕。
俊樺