一直抱住一個汽車大夢嘅華晨（1114）前大股東「逃美富豪」仰融，過去半年頻頻曝光，繼10月1日國慶閱兵期間召開越洋電話會議，大談佢嘅78億美元環保汽車投資移民計劃，噚日又同廣州車展撞期，再開越洋電話會議，為佢個瀋陽歐盟開發區汽車零部件同埋規劃中嘅整車生產基地吹風；今次仲將內地嗰部份嘅投資額由6月時所講嘅400億至450億元人民幣，擴到660億人民幣。講到咁大，記者忍唔住問佢離國多年，會唔會返去（中國）睇吓？
呢個問題當堂觸動到佢老人家神經，事關據講佢喺02年10月，俾遼寧省人民檢察院以涉嫌經濟犯罪發出逮捕令通緝，之後佢由瀋陽走咗去美國避難，一直冇返過去。今次揀瀋陽做首個零部件生產基地，唔知係唔係想同省政府修補關係呢？
仰融話自己離開多年，好希望回歸，但係乜嘢事都要經過時間處理，人都要經過時間考驗。返去？佢會試吓，試過得唔得再話過大家知。至於點解係瀋陽？佢話因為對呢個地方有特別感情，所以希望優先考慮去當地投資，唔會理歷史上誰是誰非咁話喎。