上市公司獲母公司注入項目，一般情況可為股價帶來刺激，升勢可以維持幾耐，就要視乎該股其他因素，例如業務前景、股價過往波幅水平、背後操盤者實力、注資項目係咪「筍貨」，存在的變數唔少。散戶炒股份注資，若然感覺該股後市走勢可能打回原形，一定要獲利為先。
老牌紅籌中旅（308）剛獲母公司中旅集團注入8個內地旅遊項目，涉資2.75億元，有關項目分別位於四川、江西、吉林、安徽及湖南省，中旅將以現金支付。至於吸引與否？還要拭目以待。
不過，中旅自11月起升勢明顯，惟升至2元關沽壓唔細，上周中旅股價一度跌回1.80元水平，唔排除有春江鴨沽貨，在好消息公佈前早一步沽貨，飽食遠颺。中旅上周五收1.87元，升0.53%。
其實，中旅上半年業績一般，盈利僅1342萬元，同比大跌98%，其中酒店及景區業務收益均見下降。中旅今次股價炒上，料與憧憬獲注資有關，惟利好因素已反映，後市不宜高追。
方星俠