新加坡來勢洶洶，又搞賭場又搞主題公園，大家都等緊睇香港點接招。早排病後首次外訪去新加坡參加亞太經合組織財長會議嘅鬍鬚曾，噚日喺網誌大談此行見聞，話其間約咗當地班商界領袖去由舊燈塔活化成嘅Fullerton酒店Lighthouse餐廳食飯，仲大讚新加坡保護文物同活化建築方面做得唔錯，但就似乎有長他人志氣之嫌。
鬍鬚曾又特別向網友介紹，APEC酒會有款好特別嘅飲品，叫APECcocktail，有含酒精同不含酒精兩種可供選擇，都係用21種成份溝出嚟，代表亞太經合組織21個經濟體系融為一體。佢形容味道「相當有趣」；斷估大病初癒嘅財爺係飲冇酒精嗰款啩。