自從成為候任中文大學校長後，沈祖堯就密密出席活動，貫徹佢要同各方加強溝通嘅宗旨。噚日佢接受港台訪問，話期望明年上任之後，可以同其他七間公營大學建立良好關係，甚至發展到學分互認，以至資源共用，因為佢相信中大嘅競爭對手唔係香港嘅其他大學，而係要放眼世界，去到國際層級咁話。
對於即將成為中大最年輕校長，沈祖堯話只要有理念同民眾支持，唔覺得有壓力，反而咁樣會易啲同學生溝通。至於家大學非常重視嘅籌款工作，佢話擔任逸夫書院院長期間，舊年籌到嘅錢比前年多四成幾，相信日後要拍膊頭搵人捐錢唔會好難。沈祖堯特別提醒學生，話唔理你同唔同意校長或老師嘅意見，都應該學識乜嘢係尊重喎。