冷風自北而南，吹到廣東，香港彈丸之地，那能避過，於是十一月份有過三十一度最高溫紀錄，跟住又創下最寒冷的十一月（十度以下）紀錄，氣溫變化如此大，幾難頂，於是好多人歸咎「全球暖化」（globalwarming），氣候轉變（climatechange），但講得太多，乜都關「氣候轉變」嘅事，反而令人覺得：係唔係呀？
如果講求政治正確，一定要話係，係，係。如果夠膽挑戰氣候轉變之說，就算你係甚麼權威，一樣畀人駡得狗血淋頭。芝加哥大學經濟學教授SteveLevitt喺佢本新書SuperFreakonomics裏面講吓「全球冷化」，就招來各方面嘅猛烈抨擊，極之不留情面，Levitt嘅拍檔Dubner在網上與博客大打舌戰，睇咗幾篇，你就會覺得此是「信」與「不信」之戰，好似一場宗教戰爭。
信嘅多是年青人、西歐與美國自由派知識分子，唔信嘅就係亞太區政治領袖，今年APEC峯會，對氣候轉變，減排一事，意見分歧，全無共識，只有日本願意在一九九○年的排放基礎上減排百分之二十五。一九九○年？日本經濟指數剛從八九年高位三萬八千九百點跌下嚟。如以此為減排基礎，減25%仲有二萬九千點，但最新嘅日經指數只係九千零啫噃。日本於一九九○年嘅經濟體積大過中國好多好多，但明年中國GDP會超越日本，而GDP與排放有正比例關係，中國點肯答應在一九九○年基礎削減排放呀？印度、印尼等又點會制？故此APEC對氣候轉變莫衷一是，十二月舉行嘅哥本哈根會議唔慌有成果。反而南韓已宣佈到咗2020年，溫室氣體排放目標設於五億六千九百萬噸，比2005年之五億九千萬噸少4%，意味着以後南韓會盡量使用低排放能源。
美國總統奧巴馬以「綠色總統」自居，但佢嘅CapandTrade法案遲遲未能在國會通過，原來最大反對力量係中西部農民，耕田四代嘅農夫一於反抗到底，形成鄉村與城市對抗局面，戈爾成為分裂分子，去到邊都會引起派系之爭。點解農夫反對，因為佢哋要用拖拉機肥田料吖嘛。睇嚟氣候轉變之事，必須由經濟方法解決，政治人物開國際會議，用談判方式分攤排放負擔，發展中國家唔會服從發達國家嘅！