蒲銅鑼灣，街頭小食之多絕對可以當正餐。魚蛋、雞蛋仔等港式小食一直獨佔街頭霸王寶座，近年日本小食入侵，章魚小丸子人氣過後，輪到在香港插旗年多的鯛魚燒，憑一個cute爆的魚仔造型，漸漸登上人氣榜榜首，長龍不絕成為銅鑼灣小食街霸。
記者：王震遠
攝影：陳盛臣
模特兒：Kinki@PureModels
女愛男竟然都愛日賣四千條魚
章魚小丸子是日本小食入侵本地市場的先鋒，但香港人最易變心，人氣漸漸減退。一雞死一雞鳴，跟築地Gindaco章魚丸燒店屬姐妹店的TheTaiyaki，去年尾就在銅鑼灣鬧市設店，短短時間即在眾多小食中成功上位，成為長龍店，平時日賣千多條魚仔，周末日更高達四千條。小店主打日本小食鯛魚燒，外貌似是魚形，賣相趣致可愛，首先成功搶取一班女仔fans，店前做街訪，甚至捉到不少男食客。魚餅餅身以日本麪粉炮製，打成麪漿後，於半開放式廚房在客人面前燒製。鯛魚燒質感似夾餅，表皮薄脆，咬落餅皮卻如蛋糕般鬆軟。日式傳統鯛魚燒多用紅豆作餡料，這裏更多元化，除了日本餡料如吞拿魚，還有歐洲國家風味餡料，如英國代表煙肉蛋、印度代表咖喱等。$8起錶，最貴的咖喱鯛魚燒也只$15，日本嘢、選擇多、抵食，難怪男女通cute。
日本吞拿魚鯛魚燒$8
餡料有吞拿魚、粟米和洋葱。味道有鮮甜魚香，咬落粒粒粟米，外皮薄脆，似蛋糕般鬆軟。
印式咖喱鯛魚燒$15
咬開先嚐到流質芝士，慢慢再滲出搶鼻的咖喱香，還有腸仔，惹味又充實。
英式煙肉蛋鯛魚燒$8
蛋白佔了餡料的大部份，配上煙肉的濃味，感覺好似麥當勞的煙肉蛋漢堡。
意式鯛魚燒$10
煙肉、番茄、蘑菇和番茄醬做餡，啖啖番茄香，煙肉配搭番茄感覺似pizza。
法式蘋果肉桂鯛魚燒特價$12
以蘋果和肉桂作餡料，味道清甜，口感像蘋果批，肉桂提升了不少香氣。
陳先生：平時經過都會買來吃，幾好食，有甜有鹹很多口味。
Ricky：第二次食，鯛魚燒熱辣辣，餅皮似夾餅，餡料很多變化。
TheTaiyaki（28826060）
銅鑼灣勿地臣街83號
學生最撐吉列芝心丸
開業才五個月的嵐山料理，有強大學生團隊撐場。位於銅鑼灣摩頓台，鄰近幾間學校，旁邊又是圖書館，小學生、中學生或自修生，經過舖頭都總會忍不住吃兩口，放學時間更是最旺場，一大班穿着校服的學生圍滿舖前。地理位置佔優，賣的食物亦中晒學生心，主打吉列炸物，香口食物自然是年輕人最愛，平均日賣300多份。主理人Edwin和阿楠都是廚師出身，一直想將貴價的日式炸物推向大眾化。主角炸物，揀選日本特色的海鮮，如廣島蠔、海蝦等入炸爐，即叫即炸，新鮮程度爆燈。配角醬汁也出色，每款炸物都配上對應的醬汁，如威士忌汁和他他汁等，為炸物添加幾分惹味。
和風辛味軟殼蟹$28
特別為軟殼蟹釀入蝦頭膏和香蒜，油炸過後很香口，帶點辛辣，質感比平常的更實淨。
日式吉列炸芝士$22
人氣item，日賣60多份。用上瑞士車打和法國金文畢兩款芝士，咬開香脆吉列皮流出煙韌的芝士，味道香濃。
鵝肝芝心薯茸丸$25
薯仔包着鵝肝和芝士炸香，外邊薯仔脆口又粉糯，中間鵝肝軟腍香口，配鵝肝沙律汁，鹹甜交集很惹味。
Hans：手指魚柳好脆口。價錢算平，不用貴價便吃到天婦羅。
方妹妹：薯條和芝士都很好吃，夠新鮮，樣樣都想食。
嵐山料理（92256209）
銅鑼灣摩頓台灣景樓6B號舖