陳奕迅（Eason）錫老竇係人都知，早年佢喺澳門登台嘅時候，亦試過好認真咁對台下嘅小朋友同嚟捧場嘅囡囡康堤講，要錫多啲父母。Eason唔單止講，仲身體力行，前晚8點幾，佢好有孝心咁陪住老婆徐濠縈嘅爸爸、媽媽同另一位長輩到銅鑼灣民安廣場食中菜，一行6人食到9點幾先離開。
打包有衣食
之後Eason佢哋等緊司機接嘅時候，一班人就喺大堂度傾偈。康堤可能年紀細比較冇耐性，一見到架車嚟接，就想一支箭咁走出去上車，但係俾同行嘅長輩捉住佢抱抱至可以走。Eason就好尊敬長輩，雖然康堤同阿徐已經上咗車，佢依然好有禮貌咁陪住外父同外母，就算臨走都好依依不捨咁同長輩擁抱至走。
另外，Eason走嘅時候攞住一袋剩餸打包返屋企慢慢食，可見佢唔單止孝順，仲非常有衣食。Eason外父外母等幾位老人家，喺銅鑼灣閒逛咗一陣，先至搭車離開。