呢期網民示威者非常活躍，幾乎個個禮拜都有請願活動，噚日又出動，但目的地由禮賓府改為唐唐嘅白加道官邸。十幾名包括港大女碩士生陳巧文在內嘅示威者，噚日黃昏6點到達白加道，仲帶備掛有唐唐肖像嘅花圈登門造訪，花圈上面寫住「英年早逝」，其實係寓意「當奴英年早下台，特首立會雙普選」，但都真係大吉利是。
警方未講告唔告
由於未有事先張揚，官邸外並無加強防衞，到「食蕉」知道大軍壓境，已經太遲，示威者好輕易咁去到官邸門口靜坐，「食蕉」惟有急call警方增援。警方點敢怠慢，話咁快就有幾十人火速到場，勸示威者離開無效後就逐個抬走。示威者被抬走時高叫「不要鬥噏假諮詢，垃圾政改條條fing」等口號，最終警方未有講明會唔會告佢哋擅闖官邸，只叫佢哋等消息。