唔知大家有冇發覺，今季多咗個「邊隊係新Big4」嘅話題，有人話係季初瘋狂增兵嘅曼城，有人話係連續兩季拎到第5嘅愛華頓；計我求大俠話，新特蘭都有得爭埋一份。點解？單憑新特蘭今季喺Big4身上拎到7分一點，就已經夠晒資格！大佬，你估易呀？
布魯士戰術贏阿仙奴
呢幾年一直浮浮沉沉，只能夠喺英冠同英超榜尾打滾嘅新特蘭今季大翻身，睇佢哋上月主場1:0贏利物浦，已經俾佢嚇一跳，點知再睇埋佢哋上周六點樣喺主場技術性擊倒另一支Big4球隊阿仙奴，就知佢哋唔係虛火；衰咗咁耐，新特蘭似乎終於等到光明球場重見光明嘅一日。
講番場波，名氣同兵工廠差一皮嘅新特蘭踢起嚟真係一啲都唔輸蝕，文沙、簡拿、佐敦軒達臣幾個大隻佬幾乎搶晒啲波，阿仙奴嗰啲路斯基、拿斯尼，好波但冇身材嘅球員真係俾佢哋搞到冇晒符。戰術咁成功，呢啲都係領隊布魯士嘅功勞，相反排錯陣嘅雲格就要孭鑊喇！
所謂得中場得天下，阿仙奴中場輸晒，輸波都好正常，雖然戴倫賓特（D賓）入波前，同費沙甘保嘅撻Q撞牆的確係有啲運，但係新特蘭踢得咁好，呢3分真係應得。話時話，新特蘭主場咁惡，唔知今季都仲未作客光明球場嘅曼聯又驚唔驚呢！
對Big4必有入波
諗番轉頭，自菲臘斯同昆尼時代之後，新特蘭都已經好耐未威過，家排聯賽第8，都叫近年最佳成績啦，繼續keep住呢個勢，下季隨時可以踢歐霸盃㖭呀！以前有菲臘斯同昆尼呢對高矮拍檔，家「黑貓」就係靠戴倫賓特單天保至尊喇！呢位25歲英格蘭射手今季真係fit到漏，13場聯賽入9球，最重要係佢4戰對Big4都有入波，真係可以講得上係照耀住新特蘭；計我求大俠話，佢唔好叫戴倫賓特喇，不如改名做「太陽賓特」，仲襯佢啦。話唔定下年嘅南非世盃，卡比路會預埋佢一份呢！