一年一度樂施毅行者噚日閉幕，兩支解放軍駐港部隊隊伍日前已經攞咗冠、亞軍，點知佢哋首度參賽，就惹來是非。有參賽隊伍向《南華早報》投訴，話解放軍出動前所未見嘅最龐大支援隊伍supportteam，其間又阻礙其他參賽者，批評我哋嘅威武文明之師勝之不武咁話。
毅行者搞咗咁多年，已經係香港一項體育兼籌款盛事，往年通常係前殖民地啹喀出身嘅參加者成為大贏家，估唔到一向喺香港奉行低調行事嘅駐港部隊今年處男下海參加賽事，就爆出是非。噚日《星期日南早》頭條報道，話駐港部隊今次出動咗至少50人嘅龐大支援團隊，沿途源源不絕為參賽成員供應食物、清水同衣物。
破唔到啹喀隊去年紀錄
今年得梗頸四嘅參加隊伍SalomonGatoradeRacing成員MichaelMaddess形容：「直情每5公里就見到4至8人陪着解放軍隊跑，全程你都見到佢哋嗰隊有成10個人喺度跑緊咁。」毅行者參賽者要行成100公里，參賽隊伍都會組織支援隊，沿途幫手拎食物、水同其他物資，但有參加者話，過去嘅長勝冠軍啹喀隊通常都係得兩三個人陪跑。
佢哋又話駐港部隊似乎不惜一切要贏比賽，透過支援隊運用戰術阻其他參賽者爬頭，中途又將隊員換出嚟嘅運動鞋隨處亂扔，搞到佢哋一路跑一路要避開駐港部隊啲鞋，好搞笑，但最終駐港部隊都係以12小時17分鐘完成，打破唔到啹喀隊舊年11小時52分鐘嘅紀錄。
咁究竟今次係駐港部隊唔着，定又係啲外國勢力眼紅中國崛起唔順超，八方特登問過毅行者籌委會主席陳智思。佢話，過去唔少隊伍嘅支援隊都大堆頭，有年美國駐港領事參加，出動美國海軍陸戰隊陪跑；曾有到訪嘅新加坡軍艦代表參加，亦有成隊兵陪跑；就算啹喀隊，過去都有好多人支援。咁講法，原來毅行者一路都係各國國力嘅展示。
對於今次是非，陳智思話可能同今屆競爭激烈有關，「頭5隊竟然喺1個鐘內先後抵達終點，每隊時間只係相差十零分鐘，可能咁令到某啲緊張比賽結果嘅隊伍提出質疑。」佢話會檢討今次安排，但強調毅行者係籌款活動，重點並非比賽，佢反而關注解放軍隊係咪將啲舊鞋隨處拋棄，話如果屬實會向駐港部隊反映番。
mailto:[email protected]