北京上周再出現新地王，據講係中央別墅區最後一塊低密度用地，超出底價2.6倍至50.5億元人民幣（下同）成交，折合樓面地價每平方米近3萬元，預計落成後要賣超過4萬元，最後由國企大龍地產奪得。
國企大把水，民企同佢硬碰唔化算，倒不如搵新機會。今年全國樓市升幅最急其實唔係北京、上海甚至深圳，係連接上海市嘅中國第三大島崇明島，幾個月內樓價升咗一倍有多。崇明島喺邊，佢一向係國家級濕地保育聖地，保留傳統漁村風情，村民自給自足，有啲似香港昔日嘅馬灣。
不過自從長江隧橋上月底通車以來，由上海機場到崇明島車程已縮短至45分鐘。內地朋友話崇明島係繼大浦東板塊、大虹橋板塊之後，另一個豪宅熱點。當崇啟大橋2012年通埋車，到時仲可以連接長江大橋駛至江蘇，所以早喺8月樓市已升溫，因供應極之有限，由四五千蚊起步，幾個月內炒到近萬蚊。
崇明島 發展商必爭之地
其實05年崇明島已開始規劃，定位係生態人居，喺內地嘅定義好明顯係大型地產項目。去年9月喺陳家鎮賣過地，由於當時唔係市場焦點，結果由金茂、上海中瀛、寶源3家企業拿下4塊地，打算起高爾夫球場、五星級度假酒店同生態別墅群等。打頭陣係中瀛嘅覽海國際高爾夫社區一期別墅，下月公開發售，預計每方米最少要賣2.2至2.5萬元，大Size嘅上千平方米沿高球場全景別墅可能要賣4至5萬元，首期50套別墅已經全部預定，所以都咪話湯臣一品賣得貴。
住房短期供不應求，但其實按規劃，官方打算將1411平方公里發展區分7個功能區，包括生態、國際會議及農業等，預料發展商會各出奇謀攻陷呢塊兵家必爭之地。附近嘅江蘇啟東，即2012年崇啟大橋嘅落腳點，恒大地產（3333）有成萬平方米嘅特大發展項目等緊。
不過，最直接受惠崇明島發展嘅其實另有其人，答案已在本文，仲未搵到？先賣個關子，明天再談。
胡孟青