在觀眾心目中，黎耀祥是個好戲之人，在太太Julia眼中，他更是個好丈夫、好父親，一個十全十美顧家錫老婆仔女的好男人。由拍拖到結婚至今，黎太Julia撐足祥仔16個年頭，不論台慶還是國慶，不論祥仔做配角還是主角，一年365日，她都默默在祥仔背後給予支持。對於祥仔有份角逐視帝，Julia固然戥他高興，因為由她對祥仔一見傾心開始，她便覺得：「你係得嘅。」 撰文：戴彩煥
黎耀祥今年在熱播劇集《巾幗梟雄》中升呢擔正做男主角，一句「人生有幾多個十年」叫觀眾熱血沸騰，劇集還未播完，全人類已聲嘶力竭撐柴九做視帝，群情之洶湧，絕對是歷年之冠。然而，不論台慶還是國慶，不論祥仔是男主角還是毫不起眼的綠葉，過去16年來，她都一直默默力撐祥仔，她就是祥仔賢內助Julia。
現年44歲、任文職的Julia，在93年祥仔還未扮演《西遊記》豬八戒、還是不大起眼的綠葉時，已對祥仔十分傾慕。Julia說：「珍妹（李麗珍）係我中學同學，93年我做寫字樓工做到悶悶哋，咁啱珍妹幫TVB拍《俠女游龍》，佢就叫我不如做佢助手，部劇羅嘉良係男主角，祥仔都有份做，我就喺嗰陣時認識祥仔，俾佢吸引。佢平時好鍾意同嘉良講笑，喺度風花雪月，但一放食飯，佢就會捧住盒飯好認真咁扒，一句說話都唔講，食到一粒都冇剩，覺得佢好特別、好吸引……家睇番轉頭，食飯唔出聲其實好普通啫。」
珍妹助手情書示愛
男追女隔重山，女追男隔重紗。Julia不諱言珍妹拍完《俠》劇後，自己因為見不到祥仔而囉囉攣，於是鼓起勇氣寫情書向祥仔示愛，結果一紙情書，換來今日幸福美滿的三口之家。
多年來，祥仔與無數女演員談情說愛攬攬抱抱親熱，作為太太，可曾試過打翻醋埕？Julia說：「我成日話佢：『你都唔識令我呷醋嘅！你係咪唔識做戲o架？』後尾我卒之明，平時佢對我所有表現唔會喺電視或者大銀幕見到，我喺電視見到嘅只係一個角色，唔係真嘅黎耀祥，所以我唔會將自己代入去睇。」
婆媳爭寵輕易化解
祥仔是公認的好戲之人，身為太太的Julia可認同？她說：「其實我以前冇乜睇過佢啲戲，直至幫珍妹手先至開始睇。初初我覺得佢啲戲麻麻哋，覺得佢冇大將之風，但後來諗番轉頭，佢做親都係小人物，又點會有大將之風？我覺得佢做得越嚟越好囉。自從佢拍《楚漢驕雄》做韓信，雖然佢生得唔係高大，但我覺得佢做得好好，好有大將軍嘅感覺。到佢拍《巾幗梟雄》，初初我都好擔心，究竟佢擔唔擔到？孭唔孭得起一個劇？因為始終佢唔係男主角嘅感覺，但可能張華標（編劇）劇本寫得好，柴九個角色好立體，慢慢有個化學作用。其實我最鍾意佢做《畢打自己人》嘅社長，覺得佢真係好有型，同我以前睇開嘅黎耀祥好唔同。」
Julia直指演戲是祥仔生命一部份，那麼，她可知道在祥仔心目中，演戲跟家庭哪方面較重要？她說：「呢個問題我冇問過佢，但就問過一個好蠢嘅問題：『奶奶重要啲定我重要啲？』佢話兩個都有唔同嘅重要，初初我唔接受，覺得佢敷衍我，直至我做咗人哋媽咪之後先至明白。」
Julia心目中，祥仔不但是好演員，更是十全十美的好老公，她說：「佢對家人好，對朋友真誠，無論邊個階層嘅人，佢都對人好好，又唔是非，好識得體諒人，好似個仔好唔鍾意啲狗仔隊跟蹤，有次我哋食食吓飯有人衝入嚟影相，我老公就同個仔解釋：『人哋都係工作交差，我哋又冇乜嘢唔見得人，可以嘅話咪盡量配合囉。』另外，黎耀祥其實好節儉，但絕對唔係孤寒同睇錢睇得好重嘅人，亦唔會吝嗇佢嘅時間，就算拍完通宵，都唔會話好眼瞓唔好搞佢，有少少時間佢都會陪個仔打波傾偈。」
視帝寶座幾乎是祥仔的囊中物，Julia對老公攞獎固然信心十足，但更希望的是祥仔能錦上添花，她說：「我當然好希望佢攞埋最喜愛角色啦，如果市民唔喜愛柴九，都唔會有咁多廣告商搵佢做嘢，但我都知道機會好渺茫，作為一個商業機構冇可能咁做，但我都好期望囉。」
撐足16年苦盡甘來
由拍拖到結婚，Julia撐足祥仔16年，今日見到丈夫出人頭地，企穩一哥地位，可有苦盡甘來之感？她說：「我都冇苦過，從來冇苦過！」此時，一直坐在Julia身旁的祥仔終忍不住插口說：「其實佢好開心嘅，因為佢成日覺得我未發揮得最好，應該可以有好嘅成績，所以佢見到我今日有咁嘅成績，都好戥我開心。」Julia望着祥仔笑說：「因為我成日都覺得你得o架嘛。」
恨攞獎更恨添丁
黎耀祥是今年視帝大熱，問他有沒有其他視帝心水，抑或最喜愛的電視男角時，他不假思索說：「黎耀祥，都係黎耀祥。我一向都係以事論事，電視未試過有柴九呢個角色咁立體，咁乞人憎，但又好真實。《巾幗梟雄》劇本寫得好好，唔係電視成日見開嘅慣例，監製李添勝佢哋付出過好多努力，所以好希望添哥部劇可以攞埋最佳劇集。」
我最喜愛的電視男角色將是祥仔與Laughing哥謝天華之爭，究竟祥仔信心有多大？他說：「五五波啦，我成日覺得呢個係推廣活動，希望引起大家對行業嘅關注，對電視嘅興趣，老實講，呢一年男仔嘅話題，唔係柴九就係Laughing，兩個都真係能夠帶動到觀眾，以前唔睇電視嘅觀眾，可能會因呢兩個人物而睇番。」
「都係講緣份」
去年祥仔憑《秀才愛上兵》成為最佳男配角，未知他去年攞獎信心大，還是今年信心大？他說：「兩個都大，因為角色好，唔係因為我演得好，而係當你個角色有得發揮時，自然會睇高一線。呢啲獎我覺得角色佔好大比重，唔係計邊個好戲唔好戲，如果講戲，年年都係黃秋生攞啦。好似電影圈，來來去去都係得嗰幾個好戲，唔通年年都係嗰幾個攞獎咩。」
去年Julia送了一隻價值5萬元的勞力士給祥仔，作為奪得最佳男配角獎的獎勵，今年Julia表示會送驚喜給老公，對此祥仔笑說：「我同佢講，你唔係好叠水咋喎，你送畀我嘅驚喜唔會係嚇我一跳，使晒我啲錢咁驚喜呀！」也許，這個驚喜正是祥仔恨咗多年的BB，雖然他們的兒子正橋已12歲，但祥仔夫婦仍想添個寶寶，他說：「太太真係恨咗好耐，可惜咁多年嚟都冇，呢啲嘢都係講緣份，冇得強求嘅。」
