有線電視奪得二○一○/一一至二○一二/一三連續三季英超聯轉播權，消息於十一月十六日宣佈，十一月十七日有線寬頻通訊（1097）股價立即急升21.21%，上到每股一元二角，市值增加咗四億二千二百五十二萬元，吳老闆應該幾開心噃，可惜後來又跌番啫。只不過轉播權費用係商業機密，有線唔肯講，但聲稱：「是項採購貫徹有線寬頻向以合理商業價格搜羅優質節目之政策。」但電盈嘅艾維朗就表示：「我們認為不斷將投標的價格推至一個不合乎經濟原則的水平是不對的。」換言之，有線方面認為價格合理，now就認為價格不合乎經濟原則，問你信邊個？
據行內人講，星馬嘅未來三季英超播映權費用係二億三千萬美元，二○○六年now志在必得，傳出以十五億港元搶到三季播映權。今次有線嘅標價，係十五億港紙吖還是星馬價，二億三千萬美元（十七點九四億港元）呀？香港價錢素來高過外地，今次有線出價在十八億港元左右，可能係合理推斷，如果少於十五億，就算執到咯。
now播英超比以前有線播英超，有一個明顯改善之處，就係場場播足，隨時一晚直播六至七場，等球迷睇得過癮，左丁山就鍾意揸住遙控猛㩒嘞，但有線暫時只有六十一至六十四台，四個足球台不足應付噃，而且now請埋好多評述員、肯落本，以後有線請照跟可也，左丁山係兩個台嘅訂戶，邊個台播英超都冇問題，只係想攞到播映權嘅電視台，擺啲心機落去搞好啲啫。
now攞咗西甲播映權，唔係唔好，弊在西甲要踢夜波，香港凌晨三點左右先至開波，點睇呀，就算今個月二十九號皇馬對巴塞都係咁話啦。皇馬洗腳唔抹腳，知道亞洲係一個播映權金鑛，唔會唔知一個小小香港都會互相殘殺，推高價錢益歐洲嘅，故此皇馬會長曾經想話提議西甲足球可以改在中午開波以便亞洲轉播，但此舉不合西班牙國情，冇人理會，依舊踢夜波，西甲想話在亞洲追趕英超，睇怕好難，相信藉着亞洲市場力量，英超大球會（傳統四大加曼城熱刺）在未來十年可以盡收天下兵器，一統諸侯。