今個冬天政壇一片翻叮熱潮，政改方案係翻叮貨色，立法會主席曾鈺成噚日則再做新郎哥，同伍嘉敏喺會展行禮，幾百個政、商界人士到場觀禮，特首、司、局長空群而出到賀，一對新人仲搵到前律政司司長梁愛詩證婚。
走過人生大半路程，終於搵到最愛，八方衷心恭喜曾主席同曾太。噚日行禮後，一對新人同記者講吓感受，被問到會唔會想新家庭熱鬧啲，添多個家庭成員時，曾太怕怕醜醜咁講：「冇可能。」曾鈺成62歲，有個女；曾太年屆花甲，與前夫有一仔一女，既然兩人都有兒有女，日後想過多啲二人世界都好正常。
雖然曾太話添丁「冇可能」，不過曾鈺成對自己狀態好有信心，議員譚偉豪同八方講，佢打算送五補酒畀曾主席做賀禮，點知阿曾話自己有心有力，免嘞，所以佢改送花膠。新郎哥曾鈺成話心情好似選舉等開票一樣咁緊張，笑言近日瞓得麻麻，成日「發personal嘅夢」。佢有大量鐵票，次次都穩陣當選，緊張極有限啦。
噚日婚禮好多感動位，曾太兒子彈奏《月亮代表我的心》恭喜媽媽，曾鈺成就唱咗首英文歌冧老婆，甜到漏。兩人簽字後，全場人唔使公投，一致要求曾鈺成親吻太太，據講政務司司長唐英年嗌「咀佢」十分落力兼肉緊，曾鈺成尊重民意，錫咗太太一啖。
唐唐：最緊要聽老婆話
民建聯主席譚耀宗好似半個主人家招呼來賓，佢透露送咗份「隨時可以用嘅嘢」畀曾鈺成做賀禮，實際係乜嘢，佢玩神秘。民主黨李華明送相架；涂謹申送畫，民主黨今次唔使綑綁式送禮，所以大家自由發揮。工聯會幾個議員送水晶擺設，社民連毓民向來同曾鈺成有偈傾，噚日大喜日子，自然唔會踩場啦。
唐英年觀禮後，被問到有冇忠告阿曾夫妻相處之道，佢話最緊要聽晒老婆話，咁就家和萬事興，咁佢第日向男議員拉票，咪應該向議員太太埋手？唐英年太太仲話，覺得曾鈺成為太太唱歌好冧，不過佢唔會要求唐英年有樣學樣，「佢近排壓力大，唔好煩佢。」
mailto:[email protected]
