勤+緣（2366）嚟緊星期四派成績表，股價若果調整，好兜底。勤+緣09年半年度（3月底止）大出血蝕4億銀，如無意外，即將公佈嘅年度業績，唔慌盞。但集團呢期勁蝕，全部因為好似無形資產及長期按金減值拖累，實際仲錄到稅後溢利3280萬銀，唔係差。
勤+緣喺上個禮拜頭公佈，旗下部份頻道廣告費，喺出年1月起，提價10%至15%。要咁睇，祖國經濟放晴，媒體廣告需求應該好快pickup番，連埋加價因素，勤+緣2010年度業績，可以谷底勁彈。唔好計多，純利係咁意上番07年度1.4億銀水位，勤+緣預期PE得9倍單位數，抵買。就當現價1.82元買入，中線博翻半番計，勤+緣價見2.70元，預期PE都係14倍，唔係貴。業績日，股價若果受業績震盪，買。
威華達升7成都係平
威華達控股（622）最新NAV0.5元，現價0.133元折讓高達73%，內地電力股當中，威華達折讓最大。又威華達揸住港華燃氣（1083）5.3億股，後邊港華最新造價3.07元。計計數，威華達揸住港華權益，等值16.27億銀，或威華達每股0.226元，遠遠超過現價0.133元。威華達追番9.3仙呢個差額，上到0.226元，現價係要升70%，但到時NAV折讓仍然有54%，仲係殘到痹。
錢雋