在無綫熱爆劇集《宮心計》中，楊怡扮演的麗妃陰險狡猾，現實中的她雖然親切大方，但昨日她出席完活動由電視廣播城駕車返家時，卻因為諗計避狗仔隊而被影快相及罰款450元兼扣5分，今回可謂害人終害己。另外，由於活動期間有警員抄牌，原本把座駕偷雞泊在樓下的鄭嘉穎即時以一身古裝打扮喪跑落樓將車駛走，笑爆全場。
收視爆燈的台慶劇《宮心計》一眾演員和監製梅小青，昨日到旺角佛香講堂祈福，活動後楊怡坐無綫車返將軍澳電視廣播城落妝，再駕車回家。
由於近日楊怡人氣爆燈，故她離開時有狗仔隊駕車追訪，為擺脫狗仔隊，楊怡在將軍澳廣場對開的燈位等候時，她使出計仔等交通燈由黃轉紅，趁未到紅燈時開車，緊接其後的狗仔車跟隨在黃燈開車，結果楊怡和該狗仔車被影快相兼要罰款450元及扣5分，今回可謂害人終害己。
嘉穎唔撐阿佘封后
在旺角活動中，飾演高顯揚的鄭嘉穎竟然倒戈明言不看好緋聞女友佘詩曼得視后，他說：「每年呢啲頒獎禮傳言都好多，老實講三好（指阿佘）唔係最大熱，四奶奶（鄧萃雯）個角色發揮空間大啲，三好係做一個好人，局限咗。阿佘識演戲、有實力就係公認，但我個人意見就覺得係四奶奶。」記者問到想不想阿佘奪得視后時，鄭嘉穎即說：「冇話想唔想，有時啲嘢唔係你，畀咗你都唔係好事。」
至於奸到出汁的麗妃楊怡，被問到可知道有傳阿佘是內定視后時說：「係咩？又轉咗阿佘？如果真嘅，我一定要咀佢，我冇所謂，同佢咁好姊妹我唔會失望，但我唔係將我嗰票投畀佢，我投雯女一票。呢個時間多人講同多新聞都係好事，就嚟大結局，乜嘢冇可能嘅事都有可能發生。」
話剛說完，現場即有人大叫抄牌，座駕「偷雞」泊在佛堂樓下的鄭嘉穎即時以一身古裝look狂奔落樓將車開走，終逃過抄牌一劫，楊怡隨後笑說：「哈哈哈，大家真係要有定心理準備，劇情每日都峯迴路轉。」
緋聞男女念經私語
活動上，法師帶領眾人念經時，監製梅小青與太皇太后謝雪心分別感觸落淚。至於被傳為內定視后的阿佘，在誦經期間不時與緋聞男友鄭嘉穎交頭接耳，她說：「我哋講念到邊度咋。」
談到視后一獎中與雯女競爭激烈，阿佘說：「其實都好開心一路記者講我同佢有幾激烈鬥爭，令到頒獎禮更加好睇，壓力就冇，不過對自己一定要有信心，但攞唔攞到係另一回事。」
採訪：藍文浩 攝影：仇志德
