下個月再做老襯嘅涂謹申，噚日同未來靚老婆蘇麗芬手拖手大晒恩愛參加曾鈺成大婚酒會。即將拉埋天窗嘅阿涂好坦白，話特別到場偷師，但係見到曾鈺成又唱又跳，搞到有聲有色，現場氣氛鬼咁浪漫感人，實在令佢好大壓力，恐防自己個場太遜色。
既然大家都唔係第一次，使乜咁驚吖，八方問阿涂會唔會學吓曾主席咁唱歌跳舞冧老婆兼娛樂大家，佢就話唱歌都還可以，跳舞就難啲喇，不過佢話為咗增加氣氛，婚禮當日會有神秘嘉賓出場棟篤笑。
阿涂有幾緊張？單睇佢個婚禮由12月12號搞到14號，兼且搞足三場宴請親友、議員、官員同記者朋友，就知道佢有幾重視呢個大日子啦！
中大校長劉遵義噚日都有現身，佢同麥家軒準備訂婚，至於噚日係咪偷師，佢繼續三緘其口，只係話到時會通知大家喎。