曾鈺成大婚之喜，參加宴會嘅女士們悉心打扮觀禮，芳齡37歲嘅陳淑莊以一件青綠色大褸出場，已經夠晒搶眼，點知Tanya到場後除下大褸，入面件戰衣仲犀利，一襲綠地大紅花高衩無袖旗袍花樣年華look仲搶過新娘子，露出纖幼白滑玉臂，身材玲瓏浮凸，唔少在場人士嘩嘩聲。
Tanya話驚失禮人，所以扮到咁「行」，又笑言自己恨嫁，所以要着得「行」啲博桃花。八方記得Tanya已經有個英雄哥，女方開到口，唔知人哋識唔識做。
擔任司儀嘅李慧琼平日打扮樸素，噚日大變身，以一身深紫色飲衫出場，仲化「行」妝set埋頭；葉劉淑儀都唔輸蝕，身穿鮮紅色收身上衣，烈艷紅唇look赴會，佢話可惜自己已經唔係入境處處長，否則就可以親自幫曾鈺成做證婚。