《超級巨聲》成功令觀眾對一班唱得之人留下印象，好似約劉威煌同李浩森出嚟影車，都會有路人指指點點講得出佢哋嘅名字。算唔算紅就未知，但好肯定佢哋唔係「揸得」之人。劉威煌自己架粉紅Mini一出車就要推車，至於Man味十足嘅李浩森竟然自言膽小怕揸車，男人+車，原來可以係咁。
記者：許維雅
攝影：譚盈傑
劉威煌
《超級巨聲》香港隊隊長。
李浩森
成功「復活」，晉身最後13強。
一個姣一個驚
男人一講開車經可以唔停嘴，爭住話邊副偈得，邊架車唔掂，點揸點入波先勁……不過，今日終於有例外，相約呢排憑《超級巨聲》賺到唔少人氣嘅隊長劉威煌孖住老死李浩森出嚟吹車經，估唔到劉威煌男人老狗揸架粉紅色ClassicMini，更難以相信佢對車嘅知識近乎零，買車只睇外表唔理性能，仲話呢個係佢18歲就有嘅願望。「18歲喺英國讀書睇雜誌見到Mini，第一眼已經好鍾意。鍾意佢夠細，個款夠Classic，特別係車頭，根本無其他車可以相比。所以架車坐得舒唔舒服、有無力已經係其次。當時我同自己講，第一部車一定要係ClassicMini。兩年幾前上網睇二手車，難得畀我見到有部粉紅色嘅，就即刻仆出去買，因為我特別鍾意粉色。」至於高大威猛嘅李浩森，雖然因工作需要經常揸車，但閒時就唔多鍾意揸，原因仲令人錯愕。「哈哈！因為我好細膽。加上我方向感好差，經常行錯路。我又比較大意，揸親車都嚇到啲同事不停提我小心，真係好怕揸車，平日趕時間寧願搭的士。不過如果買車，我鍾意啲寬敞少少嘅，好似日產Cube咁。」Mini就一定唔係佢杯茶，同劉威煌大唱反調，睇嚟佢哋都係傾番唱歌先啱嘴形。
唔捨得個殼
成日聽到人話舊版Mini好難養，對於唔熟車嘅劉威煌嚟講，可以話係難上加難。「係呀，買呢架Mini返嚟時太興奮又太心急，都無理架車係咪五勞七傷，結果第一日揸走架車時已經斷皮帶，惟有即刻推去附近車房整，嗰時先知驚。其實揸舊版Mini有好多學問，好似熄車前一定要熄收音機同冷氣，多啲睇住水溫錶，留意有無水滾……」劉威煌試過水箱、風扇輪住壞輪住換，又試過全副引擎換埋。「唉，你估我想換咩！揸咗一年左右連副偈都死埋，又唔捨得架外形咁合心水嘅車，惟有又用三萬幾蚊換過副新偈。我都有諗過遲啲再唔行得，就買架好啲Condition嘅車返嚟，換番呢個殼上去。」雖然「無底深潭」似乎永無填完之日，但劉威煌對呢部Mini仍誓不放棄。「初初買返嚟好多地方都係黑色，我想整到佢全部都係粉紅襯白色，所以前前後後連埋整車都放咗十萬蚊落去喇！」花盡心機同金錢喺呢部車身上，又點捨得放棄。
扮靚位
