三萬幾人嘅警隊夠晒龐大，佢哋嘅裝備亦已經好先進，最近政府《憲報》刊登一則招標消息，真係好嚇人，警隊竟然買埋手榴彈㖭！《憲報》寫明以19.8萬英鎊，即逾250萬港元，向英國軍火商ChemringDefence買入手榴彈。
手榴彈打仗先至用，八方向警隊查詢做乜要升呢用強力武器，佢哋回覆解釋，指警隊從來冇用過手榴彈，今次買嘅只係手擲催淚彈，唔知點解《憲報》寫成手榴彈。呢批手擲催淚彈共有4,000個，係訓練警察機動部隊防暴用，雖然會放出煙霧，不過冇催淚成份，即係A貨。警隊話防暴訓練仲有其他裝備，例如法德魯吋半防暴槍、雷明登870型散彈槍、AR-15步槍同史密夫威遜10型手槍。