記得20多年前在台灣看張堅庭導演的《表錯7日情》，雖然配了音但依然笑得過癮，之後的《表姐》系列更加令你會心微笑。今日再見7日情，阿庭跟你說家事開心過談電影，經歷大起大跌，電影已經是金錢以外留給孩子的一點財富，電影的夢想將會交由長子繼續追尋。 撰文：何永寧
同人唔同命，眼見今日同行閒話家常，隨隨便便一套電影在內地都可以收過億，回想當年憑愛情小品《表錯7日情》闖出名堂的張堅庭，早兩年前拍了部由范冰冰拍任賢齊，還有香港電影金像獎最佳新人徐子珊的電影《合約情人》，在內地卻只收1,600萬，阿庭話做導演其中一個考驗就是不能心灰，他說：「唔會灰心嘅，我都已經大起大跌過，做導演點都要有作品面世，每次都係要睇下一部電影。」
怕蝕本唔開戲
事隔兩年阿庭再接再厲拍了一套由賀軍翔及李小璐擔綱的愛情小品《7天愛上你》。他說：「有作品會keep到你嘅觸覺，知道市場嘅水溫，而且大家都認為家係內地電影黃金期。」在停產的兩年阿庭表示除了致力開班講授人事課程之外，就安坐家中照顧孩子，他笑說：「嗰時啲細路仲細，要放多啲時間睇住佢哋，而且嗰時香港市道都唔係咁好。」
其實說穿了是怕蝕，雖然蝕的是老闆的錢，但阿庭自言是上心的人，他說：「好多時都係朋友啲錢，就算係老闆嘅錢都唔好。所以每次開戲都有壓力，因為我係個好上心嘅人，少少嘢都驚對唔住人，累人蝕錢更加唔好。」
阿庭謂香港電影這條數越來越難計，相反內地就商機處處，他剖析現在投資者的心態說：「佢哋覺得與其投資香港片，抱住唔蝕已經好開心嘅心態，倒不如返大陸拍片有得博，就算不幸蝕本都只會係覺得自己唔夠運。」
阿庭怕蝕錢累人的心理負擔不輕，所以這趟阿庭拍新片《7天愛上你》再以成名作《表錯7日情》的7字命名，雖然有點無奈，但仍接受。由於《表錯7日情》在內地電影頻道現在仍不斷重播，不少人因而認識阿庭。因此以《7天》為名就有人會覺得阿庭在食老本，更以為他將舊作重拍。
老闆女選主角
阿庭語帶無奈的說：「其實當初我都唔係太鍾意呢個名，始終係一個心結，就係唔想人哋有任何聯想，唔想人哋以為我攞番個名嚟做。原本戲名想改做《樹頂上的戀人》，不過投資者話覺得用番7日或者7天呢啲名會直接啲同冇咁文藝，觀眾易接受啲。」就連當初是否起用男主角賀軍翔，都是由老闆的女兒拍板，因為她是賀軍翔的fans。電影人風光背後的苦衷自不待言。
幸好阿庭有長子高銘推動他重執導演筒，提起子女他特別起勁的說：「大仔同細仔嘅方向好唔同，細仔高翔鍾意踢波，家代表香港巴塞代表隊出埠踢波，而大仔好喜歡電影，佢已經睇晒屋企嘅藏片，家四圍去拍短片、寫劇本，因為經常同佢討論，所以都刺激到我去創作。今次套新片佢都有份畀意見。」他補充說：「我拍咁耐戲有乜嘢可以留畀個仔吖，錢就冇嘞，係我啲作品算係畀佢哋嘅一種身份嘅identification（認同）。」
浪漫愛情之旅
張堅庭出道憑電影《表錯7日情》闖出名堂，至今仍為人津津樂道。今次阿庭拍攝愛情小品《7天愛上你》，同樣以有期限的愛情為框架，描繪男女之間由誤解開始的感情路。
故事簡介：賀軍翔飾演的收音師跟李小璐結伴上路，各自追求理想。兩人由猜忌到互相愛惜對方，可惜好景不常，李小璐原來已經走到人生盡頭。為了不讓賀軍翔傷心，她選擇離開。被遺下的賀軍翔正傷心欲絕之時，一個截然不同的李小璐出現眼前。不一樣的態度、語氣及形象令他不知如何面對及接受……
