拔萃男書院為咗慶祝創校140周年校慶，噚晚喺會展舉行晚宴，筵開201圍，好多舊生都畀面出席，包括旅發局主席田北俊同細佬田北辰、公益金籌募委員會聯席主席余錦基、港大民意研究計劃總監鍾庭耀，同埋中信泰富前董事總經理范鴻齡等等。
咁多名人喺度，當然係揼心口好時機啦，男拔搵咗一批有紀念價值嘅物品，叫校友出暗標競投。雖然校友們唔使舉手出價，但拍賣品好快成交晒。其中一樣拍賣品都幾搞嘢，就係可以同金管局前總裁任志剛食餐晏，結果以10萬蚊成交，其實計落都好抵，因為可以攞吓投資貼士吖嘛，又可以乘機問吓任總嘅去向，話晒都係城中熱話。如果係八方，就一定問吓佢覺得繼任人陳德霖掂唔掂嘞，任總咁敢言，一定有好多嘢聽，食一餐飯包保人、財兩得。
至於全晚最高成交價嘅，就係現任校長張灼祥曾經一桿入洞嘅高爾夫球棍，50萬成交，班校友都咁畀面，到校長眉開眼笑。至於叫做「拔萃之星」嘅寶石就以20萬成交，新書《役己道人：拔萃男書院歷史》第一冊都有成14萬，夾埋其他總共籌到超過100萬，都會用嚟建新校舍。
郭慎墀太攰提早走
咁重要嘅日子，梗係由最重量級嘅人負責開幕啦，有乜嘢人可以鎮得住咁多社會名人呢？梗係校長啦，張校長、前校長郭慎墀同黎澤倫，可以話係分別睇住唔同年代嘅舊生成長，當年仲流行體罰，話唔定以前仲打過佢哋屁股㖭！
郭慎墀校長當年關懷學生猶如親生仔，因病退休後，由拔萃舊生合資買落清水灣別墅畀佢養老。噚晚好多舊生見到郭校長都噓寒問暖，但郭校長因為好攰，提早走咗，身邊人仲幫忙推傳媒訪問。
mailto:[email protected]
