國際賽後聯賽兵凶戰危，尤其下周又重開歐聯，部份列強為出線已到埋身擊。據報英國廣泛地區正受暴雨影響，加上軍情不明；我絕少玩走地，但亦唔反對波友趁周末假期，睇住直播即場草地情況同陣容方下注。今天重心，放喺英超早場，被視為最有機會挑戰Big4嘅曼城，走到最有機會被踢出Big4嘅利記晏菲路球場，雙方鬥攻合演「大」戰。
曼城攻利記鬥大
據一項訪問全部20位英超領隊嘅調查，原來有8成領隊即16人視曼城為05年愛華頓後、最有機會打破Big4壟斷嘅球隊；對於行家咁捧場，究竟領隊曉士高興定感壓力就不得而知，不過已5連和失10分嘅曼城，球會上下此刻應只想盡快重返勝軌。
艾迪巴約竟被估計為今季最佳收購，之後係戴倫賓特、巴利同格連莊臣。哎，唔通連英超領隊也屬大眾智慧俾擦鞋仔貼士，佢哋冇理由似嗰位自視波馬通嗰位公仔箱名家，夠膽大大聲俾烏拉圭1.35倍W做全晚重心，我就做唔出，尊貴領隊們咪學人交行貨喎！
曼城要打入Big4，今晚當然想作客打低利記呢隻落水狗，但係想唔等於做得到；謝四傷癒唞夠，加上利記主場一向唔曳。兩隊中路防守都唔穩，博「大」觀虎鬥好過。至於西甲巴塞守尾門，凌晨5點先開波就睇唔到咯，但估主場嘅畢爾包末段會入到波開「大」，信否？
（下次見報日：下周日）
Leung
簡介：不理盤路，不信陰謀論，最重勤力睇波，跟足軍情，吼準一擊。
今日精選
星期六16利物浦大（1.78）x星期六69畢爾包大（1.59）2x1
星期六16利物浦和2:2（13）、勝3:2（24）x
星期六69巴塞隆拿勝2:1（8）、3:1（10）2x3
簡評：考自己考波友耐性，望聽朝起身收錢