匆匆行去IFC開會，在置地行人天橋上撞到退休人士證券H，俾佢捉住傾幾句，證券H係美資投資銀行控制大局之前嘅英資商人銀行主管級人馬，近年話唔夠啲美國方式競爭，已自動退休，得閒就去打波，或間中炒番一轉。證券H話左丁山之弊病就係唔識落場打波：「你唔打高球唔緊要，但因此而冇個個週末上東莞、中山一帶，你就冇法子親身體會珠三角之蓬勃發展，失去好多搵錢機會！」唔通每個禮拜上去打波就可以搵到銀？證券H話：「駛乜講，我去咗十幾年，發覺內地人啲購買力飛躍增長，月月有變化，年年有不同，直至七年前我唔抵得，開始在上面買樓，最近就出貨嘞，賣番兩間出去，賺番所有成本之餘，仲有千零萬現金執，手頭上還有兩間屋㖭呀。香港除咗豪宅之外，冇乜好玩嘅嘞，香港啲真正豪宅面積三千呎以上者，我入行時只有三千個，到現在都唔慌有四千個，將來一定大部份落在內地人手上，你左丁山成日踎喺香港，直情係逆水行舟，不進則退。」
證券H乃醒目之人，人地去打波遊樂，佢就打波之餘，觀察埋內地社會經濟發展，落本投資埋一份。佢認為內地有錢人佔十三億人之中一個極少比例，但即使係一個巴仙咁多，已有一千三百幾十萬人，多過香港人口兩倍咁滯，如果呢班真正有錢內地人要在香港買樓買公司，大有符堅投鞭斷流咁嘅聲勢，問香港點頂。嗱，上海海通證券突然做咗程咬金，從建行工行洽購大福證券之中，橫刀奪愛，高價搶灘。證券H好耐以前已經識得皮蛋黃（PeterWong黃紹開大福證券董事總經理），知道黃兄做人面面俱圓，在證券界經驗豐富到極，十年來搞大福極有成績，已成為華資證券行龍頭大哥，遲早會被內地大戶睇中，大股東新創建亦望得高價套現，唔知黃紹開會唔會繼續做落去啫。我地唔駛學啲「未來專家」睇大趨勢（megatrends），已可推斷，本地華資銀行及證券行，將會陸續落入內地企業手中，香港仍然會係世界金融中心之一，不過，呢個金融中心嘅揸弗人、大玩家（players）唔會再係香港人。