復出計劃如箭在弦嘅陳冠希（Edison），早前啱啱先完成荷李活電影《AlmostPerfect》拍攝工作，日前低調回港幾日，噚日佢又飛咗去台灣為自己公司CMD推出嘅台灣限量版USB音樂公仔，同時亦為旗下歌手DJTommy嘅新碟宣傳造勢。
之前Edison喺淫照風暴後嚟台灣拍攝廣告，但由於唔係公開活動，所以嗰次佢就唔多合作，不過今次因為係自己公司搞嘅活動，所以Edison就比較高調，仲非常樂意回答問題，有傳佢同女友楊永晴情變，佢就大方表示兩人戀情非常好，仲自爆每次感到壓力時就會打電話畀女友訴苦，大晒恩愛話自己有個非常好嘅女友。雖然提起女友就一臉冧樣，但當問到張栢芝懷有第二胎嘅新聞時，Edison就避忌得多，現場工作人員亦即刻擋駕，但之後Edison都話要講嘅之前已喺CNN訪問中講晒。
唔想畀壓力家人
之後Edison被問到未來大計，佢話會喺台灣開3、4間Clot嘅分店，仲籌備拍3、4部電影，佢話自己好鍾意台灣呢個地方，未來亦會嚟台灣工作，但就強調唔係喺呢度復出，又話未想好自己繼唔繼續做藝人，因為佢唔想畀壓力家人，仲好享受家嘅生活，佢好感性咁話：「以前覺得賺錢就是一切，現在我就有家人、愛情、享受生活，enjoythesimplethings，而且我還沒站穩腳，如果總共要爬10階，那我只走到8階。」