一年一度樂施會毅行者噚日開鑼，1,100支隊伍共4,400人參加，今年唔止有多個紀律部隊派代表鬥一番，連解放軍駐港部隊都玩埋一份，仲派出兩支隊伍。有份參加嘅解放軍講，今次係志在參與，輸贏唔重要。雖然係咁，但阿兵哥為咗呢次毅行者，事前都要特訓，同埋帶齊裝備食物，唔怪之得呢兩支解放軍新丁隊伍，未開始已經被視為冠軍大熱。
包辦冠軍及亞軍
今年亦有6支名人隊伍，領隊包括已經參加過毅行者嘅懲教署「一哥」郭亮明、「換肝之父」范上達、醫學界立法會議員梁家騮、「金融才俊」精電國際行政總裁蔡東豪、「魔童」城市電訊主席王維基，同銀行界氣袋恒生銀行助理總經理張樹槐。
被指體能fit到同普京咁嘅郭sir噚日出發前話，近排工作忙，冇乜時間練習，加上噚日天氣凍，唔知係咪可以打破8年前個人紀錄喎。佢只係希望30個鐘頭內完成100公里路程，戰略就係食多啲嘢同着多啲衫去比賽。
毅行者要喺48小時內由西貢北潭涌出發，經過20幾座高山，橫越100公里嘅麥理浩徑同其他接續路段，終點係元朗大棠。駐港部隊結果以大熱姿態包辦頭兩名，冠軍以12小時17分完成賽事。