攻心計者，古今亦然。無綫台慶劇《宮心計》中，一眾宮女妃嬪爭權逐利鬥到出面，現實中有人為情為義，又何嘗不是各懷心計？佘詩曼與鄭嘉穎這一對曖昧男女，由開拍《宮心計》起緋聞便傳個沒完沒了，無論幾多次被拍得「同車」或過夜，為劇集在宣傳活動上你抱我、我望你，兩人仍然咬緊牙關否認，始終沒昇華至情侶關係。箇中謎團終於解開了，阿佘自言其實暗交圈外從商男友一年多，可惜戀情始終不能開花結果，至於孰真孰假，則留待看官自行思量。
撰文：朱倬誼、王崇穎
佘詩曼戀X君逾年
常說好人難做，佘詩曼在《宮心計》中的角色劉三好近乎完美，比起戚眉戚眼、藐嘴藐舌的潑辣后妃，要演繹得不平凡委實很難，阿佘接演前也三思過，考慮很多。「我係諗咗好耐，好人角色我做好多，要點樣突出同感染人，我惟有將劉三好分到好細，對每一個人有唔同嘅好，我有仔細諗過每個表情，唔想成個劇一個慈祥好人樣，盡量自然，難演o架。」
苦背劇本失眠兩月
最難忘的一點是30本劇本，對白難記又難讀，阿佘苦笑說：「要死背，我拍完呢套劇失眠咗兩個月，係拍完去咗夏威夷返嚟之後先冇事。」是否戲外仍把緋聞男友鄭嘉穎放進腦中才失眠？她說：「如果我有個人喺腦入面，一定係楊怡，戲中我對佢咁好，佢對我咁衰，佢太攻心計啦，乜嘢都想要。」
阿佘近日被指與神秘億萬富豪撻着，但她說：「如果有富豪，我唔會捱得咁辛苦啦。」反而早前她直認與嘉穎有feel過，最近兩人因宣傳《宮》劇朝見口晚見面，可是那份感覺早已消失。「我哋返工係成日見，但溝通時間唔多，所以我唔想立亂開始一段感情，總之家仲係好朋友。」
拍劇忙碌冷落男友
阿佘承認之前拍過拖，但對象不是嘉穎，是圈外人X君。「你哋唔知之嘛，但邊個都冇用，都灰飛煙滅。佢唔係圈中人，嗰時維持咗年幾。」X君是生意人，卻沒想到與阿佘拍拖後，她竟然比他更忙，阿佘說：「我係忙到連飯都冇時間食，初頭佢都忍到，但慢慢大半年……即係好似同佢食餐飯都好辛苦，可能我可以瞌一陣，但好啦，成個月冇同佢食飯，唔瞌啦，出去食飯，但佢見到我死撐，佢又唔捨得，大家心情都好矛盾，好無奈，佢係一個幾需要人陪嘅人，我做唔到。」
阿佘20多歲時曾謂盼30歲前結婚，如今她34歲，依然是單身貴族，她笑說：「我家轉咗啦，希望40歲前啦。」其實她如今已不在意是否結婚了，「我覺得結婚只係同人交代，但唔結婚，兩個人一齊生活都可以好開心，如果唔諗住生嘅話，結唔結婚都冇所謂，做人最緊要開心。」
台慶獎人爭我又爭
下月4日無綫舉行台慶頒獎禮，佘詩曼又要惡戰頭號勁敵《巾幗梟雄》的四奶奶鄧萃雯、《宮心計》的楊怡和《富貴門》的黑馬郭可盈。誰熱誰冷，誰和誰不和，阿佘見慣風浪亦平常。曾膺雙料視后威盡一時，今日她也不諱言視后唔會唔想攞：「但唔會有壓力。以前我未試過攞呢個獎，當然好想一嘗滋味，我唔係得一又要想二嘅人，但如果你畀我，我會好高興亦會好珍惜。」
儘管對手戰鬥力驚人，但阿佘也不輸蝕，挾《宮心計》和《絕代商驕》兩劇角逐視后的她揚言：「信心一定要有，不過我家都冇所謂，攞到固然好開心，攞唔到亦開心。」97年選港姐的她入行12年，威又威過，會否想再登上事業高峯？她哈哈笑說：「我家比較隨波逐流。有好劇本？拍啦；《72家租客》搵我客串？好，客串啦；台慶頒獎禮，啲人爭啦喎，一齊爭啦！湊吓熱鬧玩吓囉，得唔得是但啦，希望得啦，唔得就出年再嚟囉。」
鄭嘉穎難覓劉三好
鄭嘉穎近年以演出時裝劇為主，今年接拍台慶劇《宮心計》，多年未見的古裝造型終重現幕前，連他也自言初時頗不習慣，他說：「初初見到自己個古裝造型都有少少唔慣，覺得好奇怪，不過好彩好多同事都話幾好，先令到我對自己開始有番信心，因為自從2000年拍完一齣台灣古裝劇，之後都未拍過。」
讚三好200%好女人
劇中飾演棋博士的嘉穎，負責教導宮女後妃棋藝，後來更與緋聞女友佘詩曼扮演的劉三好私訂終身，但礙於宮規，大臣不能與宮女談戀愛，除非獲皇上欽賜，否則會招來殺身之禍，加上飾演皇上的陳豪同樣鍾情阿佘，令三角關係更形複雜。
嘉穎對於阿佘演繹的劉三好十分欣賞，他說：「佢嘅角色係會令人留下好深刻嘅印象，呢個世界上好難再搵到第二個咁好嘅人，凡事都會向正面睇同咁為人，好少會為自己。」現實中可有遇上這樣的另一半？他說：「現實中都未遇過咁樣嘅一個女仔，我相信如果真係有呢種女仔，一定喺呢個社會生存唔到，因為呢個女仔係好到200%，我自己搵到嘅就只有80、90%。」
擺緋聞上枱唔尷尬
劇中嘉穎與阿佘糾纏不清，現實中兩人的緋聞一樣錯綜複雜，對於能與阿佘朝夕相對拍劇，他說：「我同個個都朝夕相對，大家唔好將焦點放喺呢度。雖然我同阿佘之前係有傳過緋聞，令觀眾會留意多啲，但我都希望大家可以留意多少少我哋嘅演出，人哋寫乜嘢我真係控制唔到，我個人嚟講唔想太負面去睇，所以本身劇嘅質素係好重要，緋聞呢啲嘢我只當係為套劇幫手宣傳囉。」
事實是《宮》劇未播出，兩人的緋聞已被擺上枱，嘉穎倒自言沒感到太尷尬，他說：「我都唔知有乜嘢好尷尬，我其實已經講過好多次，我哋只係朋友又係同事，咁套劇出街大家出嚟宣傳係好正常嘅一件事，我個人就會樂觀少少去睇真，當宣傳套劇囉。」
無綫近年不斷拍攝宮廷爭寵或家族爭產的劇種，問嘉穎會否怕《宮》劇被觀眾拿來跟《金枝慾孽》作比較？他說：「《金枝慾孽》其實都5、6年前嘅事喇，雖然我都覺得一定會有人比較，但我反而覺得啲觀眾會將呢套劇同《大長今》去比，因為都係講一個女仔由細到大喺宮廷長大嘅故事。不過每個劇集嘅背景同故事都會有自己嘅特色，我相信會各有各好睇。」
死背文言對白頻NG
嘉穎又承認多年沒拍古裝劇令他感到有點壓力，他說：「因為今次各方面嘅製作真係好認真，從一開始試造型開始，我入行咁多年未試過要試咁多個頭套，而且今次嘅對白好多都係文言文，對我嚟講真係有少少難度，好多稿只可以死背，令到我哋成班演員每日都好似考試咁，未試過拍一套劇大家入到廠係一句說話都唔講，因為每個演員都掛住背稿。」
嘉穎更直言這次拍劇是NG最多的一次，他說：「雖然我哋個個都真係做晒功課入廠，但NG嘅情況依然出現，我都試過NG十幾二十次，因為文言文嘅對白你一定要一字不漏咁講番出嚟，唔可以好似廣東話咁前後次序可以調，對我嚟講係一個好大嘅挑戰，我相信拍完呢套劇之後都冇乜嘢對白可以難到我，我當係一個訓練。」