有一段日子無露面嘅「事旦男」，原來未收山，噚日天寒地凍，都一早冒着寒風去到立法會門前示威，今次唔係針對TVB，而係為香港電台請命。
立法會噚日討論公共廣播及香港電台未來路向，邀請公眾發表意見，多個團體都認為港台應該脫離政府，以免編輯自主受影響，尤其係新設所謂顧問委員會，名為畀意見，實際上係箝制港台嘅「太皇太后」，「事旦男」認為港台唔需要顧問指指點點；記協批評政府設立顧問委員會，係希望控制港台。
不過民間公營廣播監察小組就指港台既然係政府部門，未來就唔能夠「冇王管」，應該做政府喉舌，令施政暢通，港台亦應該虛心接納顧問委員會意見。