99年入行的楊怡近年演技備受認同，今年更憑劇集《宮心計》中姚金鈴一角角逐無綫台慶頒獎禮視后寶座，呼聲更力逼視后大熱鄧萃雯。對於首次扮演奸角已備受肯定，楊怡自言壓力不少，劇集開拍時更因各方壓力導致經常肚屙。撰文：王崇穎
近年楊怡的演技已漸被外界肯定，03年已奪無綫的飛躍進步女藝員大獎，去年更憑《溏心風暴之家好月圓》奪得最佳女配角獎，今年她再以《宮心計》中奸角姚金鈴角逐視后，氣勢更只在「四奶奶」鄧萃雯之下。過往多演正派的楊怡對於被派演奸角，她自言很興奮，因為絕對可以挑戰自己。
表現值70分
楊怡坦言角色到手後，心裏卻相當矛盾，她日前接受訪問時說：「第一次同監製傾古仔嗰陣，佢都有問我有冇後悔做奸角，我仲諗我有得後悔咩。不過我一直都好想演奸角，因為可以挑戰自己，但我又有少少擔心觀眾接受唔到，同埋怕自己做得唔夠放，所以都有壓力。」
楊怡透露拍攝時邊拍邊安慰自己，好讓自己可豁出去，她說：「今次各方面都令我有好大壓大，拍完套劇後，我先知道當人遇到壓力時係會肚屙，原來真係有呢種病，因為我每日都肚屙，心理壓力真係好大。同埋拍嗰時都有諗好唔好做到咁奸，怕自己過份咗，之後監製同好多前輩都教我唔好諗太多，唔好太猶豫。」
不過楊怡自言即使與阿佘對換角色，也同樣有壓力：「阿佘嘅角色同樣係有好大難度，只係大家嘅內心戲唔同。雖然我第一次演奸角，但我都畀自己70分，喺我嘅立場唔可以畀自己太高分，因為演戲係冇100分o架，如果攞到100分即係唔使再演啦，冇嘢可以100分，因為每個演員都會有自己嘅進步空間。」
問楊怡可有信心奪今年頒獎禮視后？她說：「今次做奸角外界反應好，我都好開心，有獎嘅話我梗係想攞獎啦！呢啲嘢唔係我可以控制到，對手又咁強，角色得到大家認同，我已經冇損失任何嘢。」
唔敢同雯女爭
提到勁敵之一鄧萃雯並非無綫親生女，故楊怡奪獎呼聲也很高，她說：「獎項由觀眾決定，無綫都會聽觀眾意見，而且我自問都唔敢同雯女爭，佢真係做得好好，我都係佢觀眾之一。」
雖然未敢同雯女爭，但另一對手郭可盈被指想用合約換獎，楊怡說：「可盈如果今年可以突圍，真係雙喜臨門，佢真係有佢自己嘅功架o架。」攝影：陳順禎
頭飾太重 頸膊紅腫
劇集《宮心計》收視高企，劇中演員雖然開心，也頓感壓力，雖然楊怡演技獲讚，但也有網民批評她劇集開始時未夠奸，楊怡說：「套劇係要一路慢慢延伸落去，唔會一開始就奸，咁樣先會有對比。」
花心思記文言文
楊怡自言為該劇下了不少工夫：「其實好多對白都係文言文，所以會比以往劇集更用心去記熟，加上成套劇好多前輩級，令到自己有種動力，要做得比平時更好。不過真係好多謝公司同監製畀呢個機會我，令我睇到自己另一面。」
除了演技考驗外，原來戲服也同樣挑戰楊怡，她說：「外觀上係我入行以嚟最重型嘅一次，set頭化妝最少要兩個鐘，個頭同頭飾又好重，有時戴到頸同膊頭都腫咗，雖然頭飾重，但當我戴上去先令我有種奸嘅感覺出嚟，因為平時自己太跳跳紮，戴咗後令我成個人比較穩重。」
