臨近年尾，收到七張請帖，全部係老友在年底之前娶妻、嫁女或者娶新抱嘅，己丑年有雙春兼閏月，拍拖水到渠成之青年男女，趕住結婚先至過新年，可以理解。又有一位老友來電話結婚，就係議員T，十二月十二日中午在深灣俱樂部請客，新娘自不然係公關靚女S。議員T聽講呢排春風滿面，認真係人逢喜事精神爽，另一位同樣咁好笑容嘅就係劉校長，在日本富豪康本健守先生為太太擺設之生日晚宴中與佢相遇，佢嘅笑容認真燦爛，介紹左丁山見麥小姐，開心到不得了。
學長森哥走上辦公室，親自派帖，佢位二公子在紐約與一位日本女士結婚請客，森哥夫婦自不然飛去紐約主禮，到咗十二月中就在四季酒店歡宴香港親朋。森哥公子乃私募基金要員，主管亞洲投資，成就一段中日姻緣，可喜可賀也。森哥已經七十幾歲，仍然精力過人，頭髮有任志剛咁多，不過全部係黑色烏卒卒嘅，可能係熱心代人奔跑辦事，身心得益之故。臨走時，森哥話返港為兒子舉行婚宴之前，有一個「東院道官立學校週年聚餐」，十二月五日星期六在九龍柯士甸道童軍中心8字樓金陶軒舉行，佢會盡量搵齊一班校友胡經昌、霍泰輝、陳景生、程伯中、鄭燕祥、湯家驊、馮紹波、彭玉榮、談兆麟、梁承達、梁柏濤、蘇肖娟及前校長邱達禧出席。咦，呢班全部係社會名人，著名學者噃。前校長邱達禧個名好熟，諗諗吓，就醒起佢係業餘賽馬時代嘅著名華人騎師，雖然冇郭子猷、鄭棣池咁巴閉，但點都係一位馬圈中堅份子，校長兼任騎師，如果在今時今日發生，唔知會唔會俾啲道德塔利班痛批呢。森哥話歡迎東院道官立學校校友參加，可向陳本漢老師電郵報名[email protected]
森哥拜拜後，證券H來電話佢位世姪做開衍生工具，金融海嘯後冇咗份工，叫大家幫手留意吓，但佢同時又講另一位世姪做分析師，俾大行挖角上北京，現在僱主即刻加佢人工留人，但北京吸引力好大，去北京做工兩至三年，張CV好似打咗個金印，以後大把公司爭住請，故此呢位世姪都係堅持去北京。係啦，大勢所趨，香港仔女早啲有上海北京工作經驗，包冇蝕底。