新世界鄭家純日前出席立法會聆訊時，指議員湯家驊收過新世界錢打官司，質疑湯點解唔申報雙方有金錢關係，事後湯家驊證實廿幾年前幫過新世界打官司，年代久遠，唔明同聆訊有乜關係。
湯：得啖笑
噚日純官代表律師去信立法會，連同50頁資料，指湯家驊05年曾為新世界提供專業服務，紅灣半島另一大業主新鴻基地產都係佢客戶，而湯家驊做律師嘅老婆，亦有為新世界提供專業服務，純官代表律師指湯家驊涉及利益衝突，唔適合參與聆訊。
俾新世界針對，湯家驊稱「得啖笑」，事關指佢涉及利益衝突，即係話佢收咗新世界錢而偏袒鄭家純等人，或者以議員身份輸送利益放生純官，但係聆訊過程中根本冇咁嘅事發生，「呢啲唔係叫利益輸送，係大公無私。」