澳門特首何厚鏵仲有唔夠一個月任期就屆滿，呢兩日分批同港、澳、內地記者見面，回顧主政10年。香港個華哥做唔足10年就腳痛下台，現年54歲嘅鏵哥腳骨力顯然好得多，就算爆出世紀大貪官歐文龍案，澳門民怨沸騰，鏵哥仍然屹立不倒做足10年兩屆任期，佢噚日話真係要感恩，「起碼最基本自己健健康康，平平安安，如果冇呢個條件，想做都做唔到。」
冇做令澳門丟架嘅事
回歸之初，鏵哥喺中央支持下打破賭王燊哥壟斷賭業局面，開放賭權令澳門經濟大躍進，當時人人搵到食，市面欣欣向榮，香港人都羨慕隔籬埠咁好景，可惜鏵哥睇錯人，歐文龍竟然係大貪官，觸發民怨爆煲，澳門人都上街，07年「抽水哥」向遊行人士示警開嘅一槍，同時敲響鏵哥管治警號，唔少人揣測鏵哥可能倒台，佢噚日承認對貪污案有不可推卸責任，但從冇考慮唔撈，「喺呢10年裏面，冇諗過向中央請辭。」
鏵哥治下，澳門發展得失大家有眼睇，冇做任何令澳門丟架嘅事，佢似乎認為自己功大於過，承認仲有好多事情可做好啲，但不能否認澳門人呢10年生活明顯改善，又話貪污遠少於澳葡年代，否則唔會有咁多外資湧入澳門。
喺阿爺眼中，鏵哥應該超額完成任務，《基本法》23條立法功在家國自不待言，又成功攔截香港民主派到澳門搞搞震，連港澳辦幹部都大讚澳門行政、立法、司法互相配合，香港都要多多學習咁話。
對於京官高度評價澳門政治體制有建設性，鏵哥噚日謙稱只係按本子辦事，「大家有眼睇，司法機關，特別對政府嘅訴訟，完全獨立審判，政府輸多過贏。」
退休後日日打Golf
董建華下台後獲委為政協副主席，鏵哥會否享同等待遇，佢話唔知道，一切由中央決定，佢最想留在澳門清清靜靜休息，強調日後唔會從商、唔會為賭場打工，亦唔再參與社會團體工作，減少與人打交道，只想趁腳骨力好，日日打Golf。
mailto:[email protected]