一連7場的森美小儀歌劇團《加樽抽》前晚圓滿結束，做足7場的麥玲玲被森美踢爆日挽價值10多萬的Hermès手袋到場，又炮製過萬元鮑魚萬歲。富貴過人的麥玲玲更疑似零酬勞貼錢做騷，劇中被麥玲玲親吻的森美即抵死笑言以吻回禮，反而頭3場有份演出的o靚模鍾蕙芝（Lavina）最終被飛出局，兩位同樣擁逼爆身材的嘉賓完全同人唔同命。
由森美和小儀等主演的歌舞劇《加樽抽》前晚在九龍灣StarHall演出尾場，方力申、吳雨霏、林海峰和林夕等均有捧場，至於在劇中演森美初戀情人的堪輿學家麥玲玲則做足7場，表現獲外間好評，反而身材同樣驕人的o靚模鍾蕙芝，在頭場時曾以訪問形式演出，在台上道出入行經歷及為所受的抨擊平反，未知是否Lavina當日的演出過於沉悶兼格格不入，故只做了3場就被飛出局。
溏心鮑魚請客
前晚尾場演出後，眾演員謝幕時在台上暢所欲言，森美更不時拿麥玲玲開玩笑，踢爆富貴過人的麥玲玲出動6位數字的私伙服飾，當中包括一個價值10多萬的Hermès手袋，等同他們全組人員的戲服開支，又指麥玲玲不時萬歲，請大家食鮑魚，而且隻隻溏心鮑，認真誇張，不過森美也得戚地指自己細個時食鮑魚當早餐。
被問到是否付出豐厚酬勞給麥玲玲時，森美說：「由頭到尾都冇畀錢，反而佢晚晚喺戲中拎出嚟叠錢就係佢私伙，而且我喺戲中都有畀佢錫啦，早兩晚佢仲想錫我個嘴，不過我唔畀佢錫，其實玲玲師傅好玩得，大家仲讚佢把聲好聽。」
直認飛Lavina
有指Lavina被飛出歌舞劇，森美指是因舞台劇太長，故每日都會刪減戲份，他說：「通常我哋會cut自己嘅部份，少啲cut人哋，所以尾場係最精裝，因為我哋啲戲份cut無可cut，最後惟有cut咗Lavina嘅訪問，因為做完3場後覺得個訪問唔係咁夾個劇，所以先cut咗佢，但係都好多謝佢嚟幫手。」
採訪：胡比 攝影：陳順禎