白鴿黨成為唐唐政改戰場主力拉票對象，李華明今年獲頒銀紫荊星章，就招嚟好多是非，有人思疑政府收買佢，令肥仔明成為疑似「無間道」。
暫與愛將劃清界線
噚日唐唐出席電台節目，有聽眾質問唐唐係唔係要借此拉攏民主黨，分化泛民；唐唐即時sayno，主動開腔為肥仔明平反，話自己身為授勳委員會主席，頒授每個勳章，包括肥仔明嗰個銀紫荊，都係睇得獎人對社會貢獻，絕對客觀，言下之意即係頒勳章與政改無關。
擺明車馬為肥仔明平反，只怕某啲人繼續陰謀論懷疑政府同白鴿黨真係有啲嘢喎。工業界議員林大輝前日無啦啦喺立法會上泛民上身，狂片煲呔冇交代普選路線圖同時間表，違反選舉承諾，唐唐被問到「家臣」係唔係代佢出氣時，笑笑口話林大輝自從做咗議員後，大家只係維持工作上溝通，除此之外冇其他關係，似乎都想「暫時」同呢位愛將劃清界線，可能係想同佢喺議會內、外裏應外合都未定。