盧海鵬同姜皓文噚日喺大埔亞視總台錄影《香港亂噏》，扮鬼扮馬鵬哥就至叻，佢今次扮成煲呔曾，仲話自己個名叫曾陰拳，姜皓文塗黑晒塊面，唔使審梗係扮美國總統奧巴馬啦！以為鵬哥會將慳電膽單嘢拎出嚟講吓笑，點知佢話今次個話題係講校園驗毒。
《香港亂噏》節目收視雖然唔算好，但係班藝員扮鬼扮馬夠搞笑，尤其係鵬哥扮嘢一絕，帶起成個節目嘅口碑，亞視要慳錢都應該加吓人工畀鵬哥，點知鵬哥擘口就話：「加鬼咩，我中途走咗再入去都係幾個月，原本叫我拍幾集，點知一做就幾個月，失晒預算，出面啲騷全部要推，重新再簽合約。」
懶理台慶日
鵬哥冇人工加，無綫有班員工就係電視城門外搞抗議話畀公司剝削福利，鵬哥聽到舊僱主單料即刻話：「一向都係咁o架啦！我都係咁至走，剋扣晒騷錢，冇得講，一邊大晒，除非唔撈，好似我咁，嗰時真係睇唔過眼。」無綫噚日生日，鵬哥講幾句贈興，點知佢仲夠晒寸咁話：「無綫台慶咩？我就唔記得啦！亞視都唔會記得，轉過咁多次老細，次次唔同日子！」