中策（235）夥同私募基金博智金融收購台灣南山人壽，想唔到會成為港、台二地嘅重要財經新聞，台灣方面，南山人壽係巨型班，體積大過台灣AIA幾十倍，賣盤自然惹人矚目。香港方面，本來冇乜點，誰知突然宣佈馬時亨做中策非執行主席，柯清輝做中策行政總裁，中策股價即時大升，自然亦成為大新聞。台灣有記者打電話嚟問，左丁山坦白講所知不多，請記者參考香港報紙仲知道多一啲。
然後台灣方面南山人壽員工上街示威反收購，一說有萬五人咁多，近年少見。究竟玩邊科？台灣方面消息話上街者並非南山受薪職員，而係保險代理agents。原來保險代理各有龍頭，英文俗稱之為family，例如本港AIA就有好幾個family，博彩及獎券事務委員會主席容永祺就係AIA「成功區」內一名大人物，而「成功區」以前嘅大頭頭就係已故嘅黃伯黃偉慶。台灣南山人壽為咗keep住啲代理，有「遞延佣金」（deferredcommission）之設，公司將部份保險佣金扣下，放在公司投資基金代為投資，年資越長者，呢筆款項越積累得多，可作退休之用，但在台灣譯為「公積金」，於是睇報紙標題，南山人壽員工追討「公積金」就有爆炸性好多。
呢筆錢既然係代理嘅，退回無妨，唯一唔好處就係代理收番呢筆錢之後，易生離心跳槽去也，如果啲代理攞咗錢就走晒，中策買入南山之後，咪要花極大功夫氣力去招聘代理，如買入一間空殼？此事在買賣談判之時，一定有傾過，但而今南山代理乘機發難，將件事搞大，將導致政府審批交易時考慮因素更多，難怪柯清輝頭大，要飛去台灣前線。
按台灣法例，人壽公司總裁必定要長駐台灣，柯清輝係中策CEO，唔係南山CEO，但中策最大筆投資就係南山，佢會唔會索性搬埋去台北，暫以台北為家呀？柯清輝係福建人，在台灣溝通有優勢，但佢嘅人際網絡全在香港不在台灣，去台北冇乜優勢噃！據《金融時報》講，南山人壽冇錯係好大好大嘅壽險公司，但南山嘅資產回報率之低，係世界壽險公司之中數一數二嘅，中策買入之後，相信柯清輝要絞盡腦汁，一千萬年薪加認股權，唔係咁易賺o架。