政府厚顏無恥翻叮05方案出嚟欺騙市民，長毛噚日一於送個微波爐畀負責推銷翻叮方案嘅唐公子，呢個似模似樣、頗有份量嘅紙紮微波爐，並非出自拿手做棺材嘅古思堯，而係幫襯紙紮舖。
諷刺政府翻叮舊方案
長毛話畀八方知，睇死政府會翻叮個舊方案，所以早幾日就落定柯打，向土瓜灣一間紙紮舖訂購一個微波爐，雖然係紙紮，不過都有要求，就係必須可以放入一本政改方案入去，「將份諮詢文件放入去翻叮。」
據講呢個紙紮微波爐價錢百幾蚊，長毛收貨後仲搵人加工，貼上「若敢翻叮」、「難逃公決」標語，手作仔都十分細心，佢大讚紙紮舖專業，有求必應，「講得出都做得到畀你。」示威道具向來由阿古包辦，今次唔使勞煩佢，乃因阿古係示威遊行個體戶，社會運動自由行，鍾意按自己心意自由創作，唔鍾意接柯打開工，長毛要度身訂做一個微波爐，而且諸多要求，唔啱阿古作風，幫襯紙紮舖更好。