以"Tryourbreast"一語成名嘅民建聯新星陳克勤，承諾會下苦功學好英文，深造逾年，怕且已經學有所成，可惜顧此失彼，過份重英輕中，無意間中文水平露底，噚日俾立法會主席曾鈺成當眾指正讀錯字，真係醜怪。
陳克勤褫奪變遞奪
唐英年噚日向議員解釋政改方案，陳克勤問唐公子，「用乜理據去『遞』奪家呢啲委任議員佢哋嘅選舉權呢？」唐公子未答問題，曾鈺成好嚴肅咁講：「陳克勤議員讀錯咗一個字，嗰個係『褫』奪，唔係『遞』奪。」原來曾鈺成指陳克勤將褫字錯讀成遞字，曾鈺成忽然玩正音正字，仲要攞黨友陳克勤祭旗，搞到全場大笑，陳克勤尷尬到暈。
遞、褫兩個字相似，好多人都會將褫字錯讀為遞，陳克勤唔識讀，八方唔覺得意外，根據中大網上《粵語音韻集成》電子版，褫字讀音「齒」，大家記住嘞。指正完陳克勤，曾鈺成又抽秤民主黨主席何俊仁，指何俊仁將「飭令」讀成「勒令」，飭字應該讀「斥」音，何俊仁俾人話唔識字，面都紅晒。
曾鈺成話議員、官員要正字、正音做好榜樣，所以出言指正，八方唔知日後佢係咪逢錯必抦，係嘅話，議員要帶埋字典、詞典開會，唔識字就問啞老師，或者立法會編制正音、正字表，作為議事規則附件，凡錯字、錯音者，不視作法定語言，講咗等如廢噏唔算數，做得議員，應該以身作則提升港人語文水平。
葉劉都捉唐唐字蝨
兩大政黨語文水平半斤八両，八方認為民建聯應該改名「文盲建港聯盟」，民主黨易名「文盲黨」好唔好？可能見曾鈺成玩正音好過癮，葉劉都忽然老師上身，發言時指唐英年指議員「工作沉重」用詞不當，因為形容病情先應該用沉重，形容工作量多應該係繁重，質疑唐英年識少少扮代表。唐公子係番書仔，沉重、繁重不分都唔出奇，不過佢冇認錯，反指議員工作繁重，可能覺得心煩，希望葉劉唔好咁煩，暗寸葉劉唔好捉佢字蝨煩住佢。
mailto:[email protected]