開宗明義叫Cube，日產Sell嘅係直腸直肚骨架賣相。新一代趕及09年壓軸到港，盒仔味依然濃郁，全車角位由方變圓，不失Cube傳統卻更加可愛。空間感依然驚人，仲可將兩排座椅放低，舒舒服服攤喺度，望住個鬼馬波浪紋天窗加窗外好風景。
記者：徐影龍
攝影：陳盛臣
Model:Suki@PureModels
座椅變大床
新一代Cube由水貨商引入，目前香港只得一部，店主仲好大膽咁揀咗部冷門卡其色返嚟。望住呢架由方變圓嘅盒仔車，雖然全車角位變得圓圓潤潤，但依然有着Cube傳統「直線」車架精髓，最大好處係內櫳減少無謂嘅凹凸位，直接令空間感增大。全車坐滿人，唔頂頭又唔頂腳，全部挨得舒服、坐得鬆動，情形等於你買層樓，論空間感同實用度，四四正正點都好用過三尖八角嘅單位啩。
內櫳有空間上嘅優勢，連座椅都配合埋，不但後排可向前收起，令尾廂容積加大，椅背更可向後作近45度傾斜，再拉低前座椅背配合，中間仲要無手枕位同車軸阻頭阻勢，座椅就即時變身一張又大又軟熟嘅睡床，大可喺上面碌嚟碌去自High一番，空間感仲勁過同樣Sell百變座椅嘅SUV。
內櫳圓潤賣Young
新版Cube唔只外形變得圓滑，連內櫳都有意無意間滲着「波浪」設計概念。最明顯係錶板中控台位，造型彎彎曲曲鬼鬼馬馬，有層次感外，黑白相襯亦極之吸引。望上車頂，仲有個Cover到整個前排座椅嘅大天窗，最過癮係玻璃下嘅遮光板，同樣用上波浪線條做框架，令內櫳畀人一種好有年輕人活力嘅感覺。咪睇車價20萬有找，車內設備一啲都唔馬虎，水貨車少有嘅後泊鏡頭、CVT無段波箱、iPod接駁介面等應有盡有，而且全部原廠，毋須擔心後期加工。1.5L車仔幾啱港人慳家性格，不過都有116匹馬力，而且用上CVT後，扭力大咗同轉波順咗，操控上更易掌握，亦因毋須經常性扯高轉數，所以車廂更為寧靜。揸車如飲咖啡，懂得欣賞，自然更樂在其中。想平平哋出架娛樂實用兼備嘅靚車，點少得呢粒「BrownSugar」。
NissanCube
引擎：1,498cc直四
馬力：116PS/6,000rpm
扭力：156Nm/3,600rpm
傳動：CVT無段變速波箱
售價：$192,800起
查詢：騰龍汽車（36203271）