【本報訊】政府再次挑戰公眾底線，05年遊花園方案被拉下馬後心生不忿，四年後硬推美其名「有間選成份」的爛方案，表面加入區議員互選立法會議席，把委任區議員心腹打入冷宮，2017依然實則虛之，糖衣毒藥逼巿民「硬啃」。
巿民認為功能組別再添加最令人「眼火爆」，只會令保皇派如虎添翼，擺明車馬不會收貨；有中產大罵功能組別助長利益輸送，政府所謂民主說到底「又搵人笨」，呼籲當權者「咪當巿民老襯」。
對於特首選委會人數增至1200人，但候選人提名門檻相對提高，身經百戰的老香港一眼看穿，到頭來選來選去隨時是「董建華」翻版──真正候選人只得一個，要巿民收貨，請把選民人數增至全港700萬人。
人民大聲疾呼，要求泛民主派抬起頭來，不能被政府威迫利誘接受翻叮倒退方案，必須利用公投、總辭等方法，挾強大民意支持，迫使政府拿出實質普選方案。 記者：雷子樂、張嘉雯
各界憤怒心聲
《方案荒謬》
中大學生會外務副會長范長豐：「睇起嚟好似向前行，但其實同05方案冇大改動……區議員互選呢種好似有間選成份，但區議會係處理地區事務，有幾大代表性呢？點解唔直接將議席分落去五區度直選呢？特首選委會就更加荒謬，加咗嗰啲議席咪又係畀專業界別，廣大巿民邊有機會參與。」
《唔會接受》
青年團體Ytalk召集人葉浩意：「特首選委會點加都好，你又唔係加到700萬人，加嚟冇意思，一樣冇認受性，我唔會接受。政府咁翻叮05方案，我冇信心2017年會有普選。點解唔能夠取（立法會）功能組別？咁唔係循序漸進，普羅市民點接受？」
《侮辱市民》
天主教正義和平委員會幹事孔令瑜：「05年有25萬市民上街反對政改方案，政府竟然冇反省，淨係識得將責任推畀反對嘅議員同市民，今次仲翻叮05方案，係好侮辱市民。2012年特首選委先得1,200人，睇唔到點可以邁向2017年普選，令我好懷疑到時又係假普選。」
《不可再拖》
大學兼任講師李偉儀：「05政改方案好似一件壞咗嘅食物，你走去翻叮，一樣會食壞人。（立法會）功能組別你唔取消，反而仲增加名額，明益民建聯。我由91年讀大學就開始爭取民主，家教書睇到新一代對普選同樣焦急，真係等到頸都長，2012真係唔可以再拖！」
《利益輸送》
香港業主會會長佘慶雲：「增加功能組別係咪真係代表到巿民心聲？我夠代表好幾萬業主啦，既然係咁應該業主有個代表、租客都有個代表入立法會，綜援戶都應該搵人入立法會啦……家功能組別做咩啫，咪就係利益輸送囉，真係咪當我老襯，心中有數，大家都知你政府玩緊咩啦。」
《贊成總辭》
網民周諾恆：「覺得佢一味喺度拖，應該有明確普選路線圖。我贊成五區總辭，最起碼畀香港人有正式表態。有人擔心選唔返，但會唔會到咗一個絕地，想爭取普選嘅人先會諗吓點樣升級呢，例如好似台灣咁天下圍攻？不過家民主黨話唔玩，好多人都諗緊點畀壓力民主黨。」
《唔會收貨》
中學生聯盟臨時執委會主席余煒彬：「好明顯係05年政改方案翻版、炒冷飯，增加功能組別根本達唔到最終普選嘅目的同平等嘅原則，我哋主張廢除咗佢；話就話第時由區議員互選，貌似有間選咁，但佢哋冇一個廣泛嘅選民基礎，我哋都唔贊成，呢個方案我哋梗係唔收貨啦。」
《塗脂抹粉》
社工謝世傑：「功能組別加議席，根本唔係將民主成份擴大。議席表面上多咗，只不過係政治化妝、塗脂抹粉，咪一樣係某啲人一人兩、三票。如果能夠消除分組點票，立法會先唔會成日都係多數人贊成嘅嘢都被否決。特首選委會人數增加，咪都係小圈子選舉。」
《要求直選》
77歲長者郭矢賢：「民建聯咁多區議員，多咗功能組別佢實贏喎！保皇派如虎添翼，咁我哋小市民永世冇直選，有共產黨一日，我哋就冇直選一日。特首選舉咁安排，就算畀你市民選，第日咪一樣『董煎話』、『董煎話』（董建華國語諧音），個個衰人咁畀你選。」
《民主倒退》
工程師陳啟遠：「我完全唔贊成呢個政改方案！兜兜轉轉，以為向前行咗，其實係一個倒退，唔係邁向普選。我哋要完全取消功能組別，家30席都咁難取消，你再整多五個，真係易請難送。我雖然係直選區議員，但係呢個方案冇達至普及、平等，就算你明益我，我都唔支持。」
