葡萄牙翼鋒基斯坦奴朗拿度（C朗）喺前日終於傷癒首次全面復操，雖然佢趕唔切救國踢世界盃歐洲區外圍賽附加賽次回合，不過，佢就希望可以嗱嗱聲復出自救同埋救皇馬！
並唔係我求大俠危言聳聽，因為C朗今季加盟皇馬雖然季初表現係威係勢，頭7場入咗9球，但係佢喺9月底歐聯對馬賽勇戰受傷後，球隊表現即刻跌watt，只得4勝2和3負，搞到教練比歷連奴個帥位危危乎。唔單止咁呀，當初皇馬以破世界紀錄嘅8,000萬鎊（約10.2億港元）由曼聯羅致C朗時，會長佩雷斯牙斬斬咁話C朗係物超所值；因為佢深信C朗會助皇馬喺球場上戰無不勝，喺球場外亦會好似03年夏天碧咸加盟皇馬時咁，帶動球會一系列產品嘅銷量，令皇馬本利歸還。
球衣銷量遠不及碧咸
點知，人算不如天算，可能受全球經濟氣候影響，又或者係因為C朗本身魅力唔及「萬人迷」碧咸，最新數據顯示，皇馬今季球衣嘅銷量同碧咸加盟時比，竟然大跌75%！一名喺馬德里外圍經營體育用品店嘅商人就話：「碧咸加盟嗰年簡直神奇，皇馬球衣一早被搶購一空！家？我哋大把存貨。」喺咁多不利因素下，C朗梗係想嗱嗱聲復出，為球會同自己重振聲威啦！據聞，C朗最快可以喺下周中對蘇黎世嘅歐聯復出。
銀河決戰鹽湖城加印門票
不過，又真係抵碧咸威嘅，皇馬簽咗碧咸後，喺03/04球季嘅商品銷量盈利升咗67%，喺04/05球季又持續增長咗6.5%。家佢效力美職大聯盟，唔單止帶領洛杉磯銀河打入季後賽總決賽鬥皇家鹽湖城；而雖然佢無法好似銀河隊友當路雲或者前英超球星龍格保咁入選今年大聯盟明星隊，不過，佢就令呢場下周日嘅大聯盟季後賽決賽門票需求大增。聯盟原本打算只係俾36,000人進入西雅圖Qwest球場觀戰，家要加印多6,000張門票。