有錢有面嘅新老爺純官被迫去立法會畀人糟躓，梗係唔忿氣，噚日再出席聆訊時，不點名質疑有議員冇申報利益。
據純官講，有大狀議員及其配偶，曾接受新世界集團聘請打官司，而且涉及銀碼好大，既然雙方有利益關係，點解唔見議員申報？雖然純官冇指名道姓，但係人都知佢針對湯家驊，但當時湯大狀不在席，冇得即時反駁。
其他議員則指純官如果對議員申報利益程序有意見，可用書面提出，聆訊期間隨口噏唔啱規矩。純官被駁番轉頭，冇癮地繼續接受盤問。湯大狀會後證實，廿幾年前接受鄭裕彤聘請幫新世界打官司，最終勝訴而且律師費唔平，之後有單案代表客戶與新世界訴訟，至於曾經提供法律意見嘅公司中有冇屬於新世界，唔記得咁多，做律師嘅太太，客戶是否包括新世界，佢冇過問。