《Left4Dead》自08年推出第一集後，大受歡迎，最過癮係Online模式可變喪屍咬人放火金腰帶。到新一集，線上新增8人「ScavengeMode」捱時間模式，而場景亦移到美國東南部，有商場、教堂、工業區，仲有遊樂場，小丑變喪屍，飛擒大咬，嚇死人咩！
文︰阿洛
生還者繼續求生
打得Wargame多，殺人殺到麻木，不如搵班打極唔死嘅喪屍揪過。今集故事只係發生在上集後一個星期，主要係另外4位生還者嘅求生故事，包括高中欖球教練Coach、新聞報道員Rochelle、職業老千Nick，及汽車修理技工Ellis，目的係穿越重重圍剿嘅喪屍群，向南方安全地方進發。玩家會以喬治亞州沙瓦納城作起點，去到路易斯安那州新奧爾良市為終點，其間穿越大型購物中心「DeadCenter」、有大量機動遊戲嘅主題公園「DarkCarnival」、海灣旁「SwampFever」及教堂「TheParish」等，場景真實感和電影感都好濃烈。
鞭屍肉搏尋快感
上集以射槍為主，今集就新增有如《DeadRising》，利用肉搏武器助你痛毆喪屍，架生包括斧頭、球棒、板球棒、平底鍋、武士刀同電鋸等，而槍械都有新嘢，包括裝有滅聲器嘅Uzi衝鋒槍、AK-47自動步槍、狙擊槍及燃燒彈等，仲可以喺槍械加上爆裂彈效果，炸爆佢哋！
屍人恩怨新模式
網上合作模式同Survival模式已經係呢隻Game嘅主菜，而今集更增加全新對抗模式「ScavengeMode」，玩家以4人為單位，組合成「生還者隊」及「喪屍隊」。生還者要喺有限時間內，人數死唔晒，兼且要將版圖上16罐電油入落中央發電機，先叫成功。而喪屍玩家就最爽，簡簡單單有殺無賠就安樂晒，而且死咗又可以翻生，乜做人慘過做喪屍呀？
Profile
遊戲：《Left4Dead2》
機種：XBOX360、PC
製作廠商：Valve
類型：射擊
人數：1-8人
售價︰$330
