香港球迷熱捧嘅英超，未來三個球季改由有線獨家轉播，由於三年前小小超旗下now以二億美元，即係逾15億港紙奪得英超播放權，所以今次有線勝出令人意外，八方聽聞有線高層都意想唔到會中標，今次好似入烏龍波咁，符碌奪得英超。
知情人士透露，由於初時估計now會繼續不惜工本保留英超播放權，因此有線以志在參與嘅心態出價，點知now出手仲低，竟然俾有線冷手執返個失落三年嘅熱煎堆，至於「參與價」多少，知情者不願透露。
微波爐壞咗唔肯換新
贏咗英超播放權，有線股價噚日彈升逾兩成，高層梗係開心，不過有線內部卻人心惶惶，事關公司奪得英超，意味日後可能要縮減其他資源填數。消息人士稱，財務總裁關則豪早前已表明會cutbudget，所以近月多個部門已有人要起身，「王牌」新聞台暫時幸保不失，出年仲頂唔頂得住則好難講。
有人形容關則豪係有線「六嬸」，即係好似TVB方逸華咁乜都要慳，內部盛傳佢可能接替吳天海做有線一哥，吳天海則返回母公司九倉更上一層樓。喺有線「六嬸」主政下，各部門都十分環保，新聞部減少出差，用嘅錄影帶雖然已服役多年花晒，都要循環再用；近期茶水間部微波爐打柴，上頭可能唔想員工食翻叮飯咁冇益，竟然唔批錢買新嘅，結果有人忍無可忍，將屋企部微波爐捧返公司為人民服務，員工都有大好家庭，為咗場波搞到家徒四壁，值得咩？
now員工憂慮中抱希望
now方面，有人分析今次冇重鎚出擊，或因年初電盈私有化失敗後勁派息，公司銀彈有限所致，而為咗補鑊，小道消息指now惟有臨時加碼奪得西甲。now內部對失落英超亦驚亦喜，驚嘅係恐怕裁員、減薪隨之而來，比較樂觀嘅人則認為公司可能調整策略，好似有線當年咁增加資源發展新聞資訊、娛樂節目，塞翁失馬，焉之非福。
mailto:[email protected]