噚日講到天氣得番幾度嘅長春，民眾喺寒風中通宵排隊買樓，無非係怕一線城市嘅樓價升溫戰線，會慢慢打到二三線城市，因為樓價實在飛升得太誇張。
上海上星期樓市成交面積減少22%，但成交均價卻比前周狂升21%到19634元人民幣（下同）一平方米，原來湯臣一品嘅天價唔係個別例子，能夠直逼每方米兩萬蚊嘅豪宅仲有唔少。睇埋10月份數字，70個大中城市只係按年升3.9%，按月只升1.1個百分點，即係話仲未反映到近期一線城市投資者，趕喺優惠政策完結前上車嘅美好願景。
買樓要好詳細諗，但炒股就唔同，可以靈活應變，有效管理風險。單睇樓價就知，內房股有望成為下一波大市動力，只係由於蟹貨較多，暫時閘住閘住，但要知道「不招人㩒是庸股」，只要做足功課，控制注碼，怕乜大炒特炒。要炒得精炒得勁，梗係揀最好，廣州樓價10月升幅係全國一線城市之冠，按年升12%。幾年前廣州樓價仲係四五千蚊米時，唔少港人都有置業當度假屋用，但就唔係咁多捱得過宏觀調控，揸到今時今日。
手頭項目食正城市規劃
根據廣州未來10年城市規劃，明確要控制荔灣、越秀、天河、海珠中心4區人口，土地供應亦買少見少。噚日提過有大量土儲嘅越秀投資（123），完成重組後將專注起樓，手頭項目食正發展規劃內嘅幾個大區︰荔灣、海珠、天河同大學城。呢個最強組合嘅代表性建築一定係廣州IFC，已躋身全球十大超高建築，有成103層當然係全華南地區首屈一指，當中又點少得四季酒店坐鎮，下榻過夜又得，即日來回傾生意都得，因為去機場或南沙港都只係45分鐘。
商廈以外，據了解今年黃金周住宅盤成交超過20億元，當中高檔住宅，喺IFC附近嘅星滙．雲錦首日開盤又係排晒隊，單日回籠5億元，差唔多賣晒之餘，成交均價高達每方米2.5萬元。未來發展仲有廣州大學城，呢個將有50萬人口嘅社區，越秀作為廣州窗口公司，喺該區已坐擁70%住宅面積嘅定價權。
胡孟青